MLB impresiona cu catcher di Aruba pa Atlanta Braves Chadwick Tromp

ATLANTA — E pelotero professional di Aruba Chadwick Tromp ta hayando mencion tras di mencion pa su prestacion actualmente den e ekipo di Atlanta Bravez. E siman aki tabatin un otro raportahe riba su prestacion, unda cu varios punto di Tromp ta resalta. Entre nan, su abilidad pa conecta cu pitchernan di su ekipo, e determinacion pa traha duro, e disciplina y su forma di ta. Y e prestacion actual pa e temporada aki unda cu e la habri 6 wega caba como e catcher principal pa e ekipo, ta wordo considera como remarkable.

E TRAYECTORIA

Hopi ta impresiona con un hoben pelotero cu apenas 46 wega hunga reparti den 5 temporada, incluyendo 13 cu Braves den 3 temporada, ta asina popular entre e coleganan di Braves y e staff y e cantidad di elogio cu e ta ricibi di otro catcher y tambe pitchernan. Nan ta impresiona con e ta actua den wega, su desicionan, su tironan y mas.  Mayoria di e elogio ta bin di e temporada aki, ora cu e colega catcher principal Murphy a keda lesiona y ta riba lista di esnan herida, y cu Tromp a wordo yama pa yuda catch. Tromp a bin di Triple A y mesora a impresiona. Diadomingo atrobe e la score cu su hugada unda cu e la percura pa dos out crucial den e wega (aunke Braves a perde e wega) tirando e hungador na tercera y segunda out, respectivamente. Ta premira cu Tromp, cu ta haya chens pa hunga cada 3 wega segun e coach, lo teynan pa un tempo mas pasobra ta premira cu Murphy mester di por lo menos dos pa tres siman mas pa recupera. Tur e tempo aki, ta momentonan cu Tromp por luci y mustra kico e tin. Loke e tin cu traha ariba y di caul su colega Darnaud tin delantera, ta e bateo. Esaki a pone cu varios biaha a cambia Tromp pa Darnaud den e ultimo inning pa e bateo. Darnaud diabierna a bati no menos cu 3 homerun den un partido, di cual uno tabata un cuadrangular. Pero esey no ta kita afo, cu Tromp ta moviendo hopi bon.