Cu un beca Tula, un studiante di Corsou por haci estudio di historia na Hulanda

WILLEMSTAD - Ministernan di Enseñansa Robbert Dijkgraaf (Hulanda) i Sithree van Heydoorn (Kòrsou) den presensia di minister di Edukashon di Aruba, Endy Croes a firma ayera un akuerdo pa instituí e beka Tula. Pa medio di e beka aki un studiante di Kòrsou por hasi un estudio di historia na Hulanda na nivel di “bachelor”.

Hulanda ta pone 10 mil euro pa aña disponibel pa e beka. Minister Van Heydoorn ta bisa ku ora e studiante kaba ku su estudio e ta bini bèk i pasa su konosementu pa otronan. E minister ta di opinion ku tur proyekto den kuadro di konosementu di nos historia di sklabitut ta yuda ku e proseso di reparashon.

Ku e firmamentu a sera un bishita di 2 dia ku e minister Hulandes a hasi na Kòrsou despues di a bishitá Aruba promé. E bishita tabata den kuadro di inisio di e programa di investigashon sientífiko internashonal di pasado di sklabitut.

Ta trata di un a koperashon global di sientífikonan riba e tópiko akí. “Mas konosementu sientífiko di nos pasado kompartí ta di gran importansia”, e minister Hulandes a bisa.

Dijkgraaf kier promové e kolaborashon di konosementu riba pasado di sklabitut entre universidatnan rònt mundu, kuminsando den nos propio Reino. Pa investigashon na Aruba, Kòrsou i St. Maarten el a destiná 375 mil euro te ku 2027.

Ku esei sientífikonan lokal por hasi investigashon riba pasado di sklabitut den e paisnan akí. Kompartí konosementu ta un punto di salida importante di e programa di investigashon global.

Na e momentunan akí ta elaborando riba kon e lo bai ta. E promé ideanan ta pa krea un ret di investigashon, eksposishonnan ambulante, un buki òf un konferensia di apertura i klousura.

Sekretario di estado Alexandra van Huffelen a anunsiá aña pasá na e konmemorashon di Tula na Kòrsou ku gobièrnu Hulandes ta establesé un kátedra pasado di sklabitut pa Aruba, Kòrsou i St. Maarten. Awor Dijkgraaf a duna kontenido na esaki ku e koperashon sientífiko, den forma di un kátedra internashonal ‘impakto di e pasado di sklabitut’. NOTA: Texto ta scirbi den Papiamento fonetico di Corsou.