Studiante di Corsou ta prome pa haya BSN prome e sali pa Hulanda

WILLEMSTAD - Djabièrnè awor e promé studiante yu di Kòrsou ta haña su number di identifikashon personal (BSN) promé ku biaha pa Hulanda pa su estudio. Minister Hulandes di Enseñansa, Kultura i Siensia Hulandes, Robbert Dijkgraaf ta na Aruba i Kòrsou di 8 pa 12 di aprel pa dirigí un mishon di konosementu i na e okashon aki huntu ku ministernan di enseñansa di Kòrsou i Aruba, Sithree van Heydoorn i Endy Croes lo hasi entrega djabièrnè awor di e promé BSN na un studiante di Karibe promé ku e sali pa Hulanda.

E BSN ta permití nan regla algun asuntu relatá na nan estudio adelantá kaba for di region Karibense. Ku e BSN, studiantenan por pidi un DigiD promé ku nan sali pa Hulanda, kual nan por usa pa “log-in” riba e wèpsaitnan di gobièrnu Hulandes.

Asina, studiantenan por “log-in” por ehèmpel, riba Mijn DUO i mira e suma di nan finansiamentu di estudio, informá tokante kambio i risibí mensahenan personal. Tambe studiantenan  por traha un sita adelantá na algun munisipio unda nan lo bai biba pa inskribí nan mes.

KOPERASHON

Huntu ku institutonan edukativo Dijkgraaf ke fortifiká alabes kolaborashon den edukashon i investigashon entre Hulanda, e paisnan den Reino i Hulanda Karibense. Mas konsiensia di e efektonan di e pasado di sklabitut tambe ta pará sentral.

Van Heydoorn ta bisa ku ta e intenshon ku na Kòrsou e institutonan di enseñansa di Hulanda i e islanan ta firma un un deklarashon di intenshon pa konhuntamente eksplorá e posibilidatnan di kolaborashon dentro di Reino. E eksplorashon aki mester kondusí na mas palabrashon.

No ta trata solamente di enseñansa, na Kòrsou tambe tin investigashon i siensia riba e programa. “Koninklijke Nederlandse Academie van Wetenschappen” (KNAW), “Nederlandse Organisatie voor Wetenschappelijk Onderzoek” (NWO), De Jonge Akademie i investigadónan di e parti Karibense di Reino ta buska input pa un agènda di konosementu, pa asina promové e posibilidatnan di investigashon riba temanan sosial aktual na e islanan Karibense.

Ta papia di intensifikason di kolaborashon riba tereno di investigashon ku e parti Karibense di Reino, i eventual finansiamentu di esaki. Durante e seshon lo tene kuenta ku e bareranan ku ‘postdocs’, studiante di master i ‘promovendi’ ta eksperensiá, por ehèmpel akseso na finansiamentu pa investigashon.

NWO ta traha riba e posibilidat pa proyekto di korto plaso, motivá pa kuriosidat. E eksperensianan di hóben investigadó karibense tambe ta sentral den esaki.

Nan ta yuda pensa kon nan por haña mihó sosten. Pa e grupo aki di investigadónan hóben, NWO ta bai desaroyá posibilidatnan di finansiamentu pa investigashon di promoshon dentro di e programa “Caribbean Research”. NOTA: E texto ta scirbi den Papiamento fonetico di Corsou.