Yiu di Corsou ta firma extension di contract di 50 miyon dollar cu Boston Red Sox

BOSTON - Ceddanne Rafaela ayera a yega na un akuerdo pa un ekstenshon largu ku Boston Red Sox. E ekstenshon aki lo ta di ocho temporada i 50 mion dòler, ku ta nifiká ku Ceddanne tin kontrakt ku Red Sox te 2031. Esaki ta pendiente ainda pa un tèst médiko ku e pelotero yu di Kòrsou mester kompletá.

Ceddanne último añanan tabata un di e mihó prospektonan di e organisashon di Red Sox. Promé ku e temporada aki a kuminsá e tabata e di kuater mihó prospekto di Red Sox. Miéntras MLB Pipeline tabatin e yu di Kòrsou komo e di 71 mihó prospekto den beisbòl.

E ekstenshon aki ta bini despues ku Ceddanne tabatin apénas 38 wega hungá ku Boston Red Sox den Liga Grandi.

E hóben di 23 aña a mustra kaba den e tiki tempu den Liga Grandi, ku su wante ta di nivel di wante di oro. E temporada aki mes el a skapa Red Sox na vários okashon kaba ku su wante.

Huntu ku esaki e tin e kombinashon di poder i velosidat, ku evaluadónan di talento ta bisa ku tur esakinan por yud’é bira un superstrea den Liga Grandi.

TRABOU DURU A DUNA RESULTADO PA CEDDANNE

For di despues di a firma ku Boston Red Sox riba 2 di yüli 2017, Ceddanne Rafaela a traha duru pa awe e ta den Liga Grandi. El a kuminsá hungando den Dominican Summer League na 2018 i siguiente a pasa pa hunga na Merka. Meskos ku tur otro prospekto el a pèrdè 2020 pa motibu di Covid-19. Despues di esaki temporada 2021, 2022 i 2023 tabata tremendo temporadanan pa e yu di Kòrsou. Durante e periodo aki el a habri wowo den e organisashon di Red Sox, ku a pone ku na final di temporada 2023 el a hasi su debut den Liga Grandi. Tur esaki Ceddanne a logra ku trabou duru, disiplina i hopi sakrifisio. NOTA: E texto ta scirbi den Papiamento fonetico di Corsou.