OE AZV a termina contracto cu dentista Bermudez

ORANJESTAD – Diamars Organo Ehecutivo AZV (OE AZV) a informa cu entrante 1 di mei 2024 e contracto entre Organo Ehecutivo AZV y dentista Ernesto Bermudez (Dental Solutions Aruba) ta termina. Pa garantisa e continuidad di cuido dental, nan a invita tur asegurado cu ta inscribi cerca dentista Ernesto Bermudez pa haci cambio di dentista mas pronto cu ta posibel. E ta den bo interes pa scoge un dentista nobo di bo propio gusto. Ultimo dia pa haci cambio di dentista ta 30 di april 2024.

TRASPASO AUTOMATICO

Den caso cu e asegurado no haci uzo di e oportunidad pa busca un dentista nobo y pa 30 di april 2024 no tin un dentista nobo, Organo Ehecutivo AZV mes lo haci un traspaso automatico pa un dentista nobo. Tocante e decision aki, lo bo haya un notificacion den bo AZV app.

DESACUERDO

Si ainda despues di ricibi e notificacion di e traspaso automatico; e asegurado no ta di acuerdo cu e traspaso automatico -es decir cu no ta di acuerdo cu e dentista nobo cu OE AZV a scoge p’e-; e ora tin tur oportunidad pa e asegurado mes haci un cambio di dentista via e AZV-app.