Grupo di Venezolano ta protesta dificultad pa por vota pa eleccion: Consulado ta desmenti

ORANJESTAD – Faltando 4 luna pa e eleccion presidencial di Venezuela, un grupo di Venezolano residencia na Aruba a expresa su preocupacion y frustracion ‘pa e ausencia di material electoral den Consulado (di Venezuela) na Oranjestad. Asina e portal di Venezuela LaPatilla.com ta raporta. Segun e portal, un grupo di Venezolano a presenta nan disgusto na e sede di Consulado. Mes momento nan a informa nan mes di e rekisitonan nobo cu ciudadanonan Venezolano residencia na Aruba mester cumpli cu ne pa por eherce nan derecho di voto: Carda di Censo, y cedula di identidad di Aruba, y pasaporte y cedula Venezolano vigente. 

MATERIAL

Segun e grupo, e ausencia di e material electoral no ta e unico obstaculo cu nan ta enfrenta na Aruba. Hopi ciudadano, tin pasaporte venci, y lo ta confronta dificultad pa renoba esaki, pa diverso circumstancia,. Esaki ta dificulta aun mas nan participacion na e proceso electoral na caminda. 

CONSULADO 

Noticiacla mientrastanto por a compronde di fuentenan den e Consulado Venezolano cu, contrario na e declaracion di e ciudadanonan preocupa, cu diariamente e consulado ta atende via cita pa renoba pasaporte y ta haci e esfuerso pa cu e hendenan haya nan pasaporte, “ no obstante e hecho cu gobierno di Aruba tin e frontera cera”. Ademas nan a clarifica cu e Consulado no ta CNE (Conseho Nacional Electoral) y nan (consulado) ta en espera pa wordo instrui pa CNE ora cu nan haya e ekiponan necesario pa habilita e proceso di inscripcion of actualisacion di e registro electoral. Unabez esey tey, nan ta garantisa e atencion necesario. NOTA: Potret cortesia LaPatilla.com