A.T.A: Encuesta di ‘Local Sentiment’ ta yuda e organisacion den fiha posicion y maneho

ORANJESTAD – E siman aki, oficina di turismo di Aruba, A.T.A. a tuma e oportunidad pa gradici e comunidad local pa participacion na e encuesta di ‘Local Sentiment’. A.T.A. su maneho ta ilustra cu  investigacion ta keda un punto importante. E ta yuda e organisacion den fiha posicion y maneho, pa asina entre otro facilita desaroyo pero tambe provee conseho, y influencia esaki unda por. Feedback cu ta colecta ta di sumo importancia. 

Ta importante colecta feedback di local y bishitantenan entre otro. Na 2015, A.T.A. a amplia su “scope” pa asina inclui un A.T.A. mas presente riba e panorama local. Na 2016, A.T.A. a cana e trayecto extenso di ‘Cu Mira pa Futuro’ caminda cu e comunidad local a participa activamente. Aki ta caminda cu e comunidad a trece dilanti hopi accionan cu ta desea di mira den futuro. Accionan cu te ainda ta inclui den e maneho di A.T.A. Alabes, ta conduci diferente investigacionan anualmente, perdiodicamente y regularmente, caminda ta señala resultadonan positivo y preocupacionan debidamente, esaki ta inclui parti di e preopacionan cu ta presente actualmente. A.T.A. ta hopi orguyoso di e ekipo di profesionalnan cu ta pone hopi enfoke riba trayecto di investigacion; hopi accionan ta inclui den diferente raportnan y maneho nacional. Pues no solamente puntonan ta resulta den plannan di A.T.A. pero tambe por ehempel den Plan maestro di Aruba “Repositioning Our Sails”, den e plan y ley di zonificacion di Aruba (ROP/ROPv), den maneho economico y mas. 

Satisfaccion y feedback di nos bishitantenan ta wordo colecta di diferente manera. A.T.A ta analisa mensualmente e ‘Guest Experience Index’, y recientemente via e ‘Visitor Sentiment Research’ cu a midi crowdedness den 14 area na Aruba. Pero tambe A.T.A. ta conduciendo focus groups actualmente. E resultadonan di e ultimo estudio a wordo comparti januari.  

Pa locual ta trata ‘Local Sentiment Research’, esaki ta bira e di tres biaha cu A.T.A. ta conduci e encuesta. Pa yega na esaki ta compila informacion di diferente manera y entre otro ta benchmark locual otro destinonan ta aplica. Den e caso aki a por ehempel tuma nota di locual e pais di Hawaii a haci, un pais cu retonan mara na exito den e industria turistico. A.T.A. ta utilisa e encuesta, y e metodlogia di e encuesta di Hawaii pa loke ta formulacion di encuesta di Local Sentiment di Aruba. Banda di ta utilisa e ehempel di e metodologia di Hawaii, ta consulta otro plataforma/ destino pa asina formula/ saca informacion cu ta util pa e isla di Aruba. 

Durante e siman binidero, A.T.A. lo acerca diferente schoolnan pa asina yega mas cerca di e hubentud, caminda cu lo enfoca riba nan pensamento, sea positivo of cualkier preocupacion cu nan lo por tin.

A.T.A. ta reconoce y ta consciente cu tin hopi retonan como tambe oportunidadnan presente, es decir hopi trabou cu mester wordo realisa. A.T.A. ta invita bo persona pa participa na e encuesta. Laga bo bos resona via link: https://bit.ly/4aaajZY of riba nos pagina social: Aruba Tourism Authority. Tambe por email Melanie Evans-Kelly na m.kelly@aruba.com pa cualkuier feedback.