Corte a declara e compania doño di emisora Curom/Z86 oficialmente bancarota

WILLEMSTAD – Despues di 3 luna cu e emisora a ‘bay for di aire’ y keda keto riba e situacion, Curom Broadcasting NV oficialmente ta bancarota. Corte dia 8 di maart ultimo a dicta esaki y a pone e caso den man di un curator. For di 22 di December den forma repentino e emisora a bay for di aire, y ningun hende a papia mas, ni pa duna comentario kico ta kico. Tur e lunanan aki tabatin masha speculacion riba e situacion. Segun e portal di Corsou Antiliaans Dagblad, e director/doño Orlando Cuales a confirma solamente cu ta nan mes a pidi pa e bancarota, y no cu ta otro partidonan creditor a haci esaki. Pa varios luna prome cu December, e trahadonan no tabata ricibi pago, y e cos tabata malo. Hopi a tuma e gerencia na malo pa e forma con cos a bay, te cu e la yega na e forma aki. E emisora tin un historia largo y ta lamentable cu e cos a yega asina leu y cu mientras cu un otro emisora di peso, Hoyer a caba recorda 70 aña, Curom tambe tabata uno cu tin historia y tabata considera como un di e emisoranan mas serio y responsabel di e isla. Potret cortesia Curacao.nu