Aeroliña Avianca a scohe Aruba pa su campaña promocional di reposicionamento

BOGOTA - Aruba, conoci pa su beachnan bunita y clima perfecto henter aña, a wordo selecciona pa e scenario principal pa e campaña di reposicionamento di e aeroliña Avianca. Asina e aeroliña a confirma e fin di siman aki. Segun e aeroliña e ta difundiendo e campaña atraves di su diverso canalnan di comunicacion. Segun e aeroliña, e eleccion di Aruba ta basa riba e reputacion di e isla como destinacion turistico di primera clase, unda cu e ta wordo premia pa varios premio pa su beachnan. Entre nan, e premio di aña pasa como e miho beach di Caribe y e di dos miho di mundo. Un premio cu TripAdvisor a otorga na nos isla aña pasa. E premionan ey,  fuera di pone Aruba riba un pedestal internacional, ta awor yuda cu companianan manera Avianca ta usa esey como un motibo suficiente pa nan campaña promocional.