Na Corsou grupo Corendon a cumpra The Ritz Village den Skalo

Na Corsou grupo Corendon a cumpra The Ritz Village den Skalo

Posted on 02/28/2024 10:42 am AST | Updated on 02/28/2024 10:43 am AST

WILLEMSTAD - Grupo Corendon realmente tin plannan grandi i serio pa ankra nan mes i marka e nòmber Corendon pa semper riba e isla aki. Corendon ta un kompania grandi, i aki na Kòrsou nos ta identifik’é ku e proyekto hotelero na Otrobanda i awor tambe ku su propio kompania aéreo. Pero Grupo Corendon a disidí di drenta Skalo, i por bisa ku dos luna pasá, na prinsipio di yanüari 2024, e konsorsio a kumpra The Ritz Village den Skalo. Esei EXTRA por a komprondé di su informantenan, kual a keda konfirmá tambe pa sr. Norman Serphos, kende ta enkargá ku e parti di komunikashon na Corendon.

Naturalmente ta trata aki di un dil mionario, kual el a laga pa gerensia mes divulgá. Segun sr. Serphos, no tin duda ku e grupo aki i prinsipalmente su CEO, sr. Atilay Uslu, stima e pais aki ku yama Kòrsou, i esaki ta otro prueba. Biniendo bèk riba e benta di The Ritz Village, segun sr. Serphos e grupo tin henter un plan di remodelashon dje hotèl. Lo bai invertí sufisiente sèn den e fasilidatnan ku ta konsistí di un 125 kamber pa e ta mas atraktivo, i esaki ta un proyekto di un durashon di mas o ménos 2 aña.

Kontratempu:

Pero e dil aki no a bai sin un tiki kontratempu, ya ku na momentu dje traspaso a bin resultá ku tabatin un parti grandi dje personal trahando sin e dokumentonan rekerí pa nan ta legalmente den servisio. Teniendo kuenta ku gerensia ke traha korekto i kumpli ku regla, a pone komo kondishon estrikto ku tur hende mester tin nan papelnan na òrdu. Kaminda ta nesesario i si por Corendon mes lo yuda pa aselerá e proseso.

Segun sr. Serphos, ta bini aserka tambe e proyekto di Janthiel ku tambe lo bai pasa den e mulina di remodelashon.

Propio agensia di biahe:

Manera ta konosí kaba, entrante luna di novèmber 2023 Corendon a start ku ehekushon di su propio buelonan, ehekutá ku un Airbus A350-900 ku 432 asiento na preis super ekonómiko. Te ku awor ta agensianan ageno ta bendiendo pasashinan pa Corendon. Pero e kompania a disidí ku pronto e lo bai over na su propio agensia di biahe via di kua e lo bende su pasashinan. Esei tambe lo ta un forma pa ekonomisá riba gastunan. NOTA: E texto ta scirbi den Papiamento fonetico di Corsou. 

  • Powered by SETAR