Venezolano a yega y baha na Corsou cu “Kite Surfing” y horta den varios cas

WILLEMSTAD - Fin di siman tras di lomba polisnan a hasi algun detenshon. Entre nan djasabra último polis a risibí informashon ku ta indiká ku tin un hòmber ta hòrtando den vários kas den área di “Rif St. Marie”. Esaki a pone ku sentral a dirigí polis na e sitio i na yegada di e unidat, a detené e hòmber A.X.C., di 39 aña di edat nasé na Venezuela, pa e ladronisia ariba menshoná. Kontinuando ku e investigashon ku polis a hasi na e sitio, a resultá ku e hòmber di nashonalidat venezolano a baha di un forma ilegal ku “Kite Surfing” i despues kometé vários ladronisia den e kasnan den e área.

A presentá e hòmber indokumentá dilanti di un fiskal ouksiliar ku a ordená su enkarselamentu pendiente di mas investigashon i despues su deportashon. NOTA: Texto ta scirbi den Papiamento fonetico di Corsou. NOTA: E potret ta uno generico di kitesurfing y ta netamente pa ilustracion y no necesariamente ta e persona refleha den e articulo aki.