Flanegin: Ministerio Publico no ta prome yama pa trata un problema legal of solucione

ORANJESTAD - Ministerio Publico no ta prome yama pa trata un problema of solucione. Na palabra tabata Procurador General nobo di Aruba Amalin Flanegin diahuebs durante un discurso pa instalacion di tres huez nobo. Segun Flanegin, e ta ripara for di inicio di su funcion na e departamento, “ cu (hende) ta spera di Ministerio Publico cu ley penal como instrumento, por soluciona tur problema, hasta problema cu eigenlijk no ta su “core business”. Segun Flanegin, ademas di e hecho cu nos no por actua riba tur tereno, pasobra simplemente nos no tin suficiente hende (“capaciteit”) pa esaki, e realidad ta cu no ta ministerio publico den cierto situacion ta e prome yamá pa trata cu un problema of solucioné.

Flanegin a duna un ehempel tambe pa proba su punto. 

Na juni aña pasa na Den Haag a tuma lugar un debate entre e presidente di e colegio di Procurador General sr. Rinus Otte, e jefe di polis Nacional sr. Henk van Essen y e miembro di e Raad voor de Rechtspraak sr. Peter Pulles. E debate a tuma lugar despues cu un incidente a sosode den un supermercado den cual un dama a bira victima di un persona cu comportacion incomprendible “onbegrepen” o comportacion bruha (“verward”).

E ponencia di e debate tabata: leynan penal no ta e solucion pa tur problema social.

Aunke semper a existi den comunidad e fenomeno di hende cu problema mental, cu ta “verward” of “onbegrepen”, aparentemente e ultimo añanan e problema aki a aumenta na Hulanda. Segun polis cada bes nan ta hayanan confronta cu mas “melding” na Hulanda. Na 2022 polis a wordo confronta cu 138.000 melding di casonan di hende cu problema mental.

E Veiligheidshuis Aruba ta un red di partnernan di e cadena di husticia y e cadena di cuido. Meta ta pa aporta na seguridad di Aruba dor di preveni y reduci cu hende ta cay back riba mal caminda (recidive), molester, criminalidad y asina yama ‘maatschappelijke uitval’ ora di problemanan complica (cu hende ta stop di funciona den comunidad). E hermentnan ta un combinacion di represion, intervencion y cuido.E partnernan ta (entre otro) Ministerio Publico, Polis, Voogdijraad, FCCA, Stichting Hunto y Wit Gele Kruis, pa menciona un par. Ademas tin tambe e partnernan flexible, manera OC y Departamento di salubridad public (fuente:omaruba.aw). Segun Flanegin, 

den e debate a indica cu leynan penal tey cu nan funcion normativo (“normerende werking”), pero nan no ta cura. Y si e comunidad mes a percura pa duna cuido na un persona asina, quizas lo por preveni pa algo mas serio pasa.

Situacionan similar nos tambe tin cu trata di evita, dunando por ehempel cuido na e persona cu ta den e situacion dificil aki. Den Reino, pues tambe na Aruba, tin atencion pa duna ayudo dor di introduci por ehempel un “crisisdienst”.

Di e forma aki ta duna e cuido necesario na hende cu ta malo y ta trata di evita cu algo mas grave por sosode, Flanegin ta finalisa bisando.