Luc Mercelina a bira formado di gobierno nobo di St. Maarten

Luc Mercelina a bira formado di gobierno nobo di St. Maarten

Posted on 02/5/2024 9:51 am AST | Updated on 02/5/2024 9:51 am AST

PHILLIPSBURG - Lider polítiko di partido URSM, e yu di Kòrsou dr. Luc Mercelina lo ta e formadó di e próksimo gabinete di St. Maarten. E formashon lo bai ta entre e partidonan URSM, DP, PFP i NOW.

Kada partido a haña 2 asiento durante elekshon dia 11 yanüari último i huntu ta forma un mayoria di 8 di e total 15 asientonan den parlamento di e isla ku ta forma un union monetario huntu ku Kòrsou.

Un dia despues di elekshon e 4 partidonan a firma un deklarashon di intenshon pa forma un gobièrnu huntu. Despues di esaki gobernadó di St. Maarten, Ajamu Baly tòg a nombra Nilda Arduin i Candia Joseph komo informadó ku e tarea pa sondia e posibilidatnan di un mayoria ku ta dispuesto pa forma un gobièrnu nobo.

Den e wikènt tras di lomba e informadónan a entregá nan rapòrt na Gobernadó Baly. Den e rapòrt aki a hasi naturalmente menshon di loke tabata konosí kaba, esta ku tin 4 partido ku a firma un deklarashon di disponibilidat indikando di ke traha huntu pa e próksimo periodo di gobernashon.

Aworakí ta di warda Baly ofisialmente inisiá e proseso di formashon, pero ta konfirmá kaba pa partidonan ku a firma e deklarashon di disponibilidat ku Mercelina lo bai ta formadó di e próksimo koalishon. E proseso aki ta enserá pa yega na un akuerdo di gobernashon entre e 4 partidonan, postulashon di kandidatonan pa bira minister i screening di e kandidatonan aki i al final huramentu di e ministernan.

Mientrastantu e spekulashonnan ken ta bira minister ta drei rònt kontinuamente na St. Maarten. Luc Mercelina ta e kandidato pa e puesto di promé minister. URSM a negoshá tambe e ministerio di VSA (“Volksgezondheid, Sociale Ontwikkeling & Arbeid”) pero no ta konosí ken lo nombra den e funshon aki.

Lider di Partido Demokrat, Sarah Wescott-Williams lo ta kandidato pa bira presidente di parlamento. Un otro nòmber ku ta bai rònt ta esun di Viren Kotai komo kandidato di Partido Demokrat pa bira minister di Finansa.

Ken DP ta hasi minister di Turismo, Asuntunan Ekonómiko, Transporte i Telekomunikashon no ta konosí ofisialmente ainda. E rumor ta kore ku ta kasá di Theo Heyliger, Grisha Heyliger-Marten ta kandidato pa e puesto.

Un otro puesto di minister ku tin bastante rumor rondó di dje ta esun di Hustisia. Partido NOW a negoshá e kartera aki huntu ku e kartera di Enseñansa, Kultura, Hubentut i Deporte.

Na promé instante tabata bai e rumor ku Lyndon Lewis lo ta kandidato pa e puesto di minister di Hustisia. Entretantu ta tende e nòmber di lider polítiko di NOW, Christophe Emmanuel ta bai rònt ku ke postulá su mes.

Partido PFP ku tur probabilidat lo skùif Raeyhon Peterson dilanti komo kandidato pa minister di VROMI (Volkshuisvesting, Ruimtelijke Ordening, Milieu & Infrastructuur”. Peterson lo ta alabes e vise promé minister.

Komo kandidato pa bira minister Plenipotensiario na Den Haag, PFP lo manda nòmber di Patrice Gumbs aden. NOTA: Texto ta scirbi den Papiamento fonetico di Corsou. 

  • Powered by SETAR