Hopi ciudadano no ta respeta fecha di tira klapchi y ta sigui tira manera nada

ORANJESTAD – Mescos cu a sosode ultimo añanan, despues di tiro, hopi hende no tabata respeta e ley y regla di klapchi, cu ta stipula cu e ultimo rato cu ta permiti pa tira klapchi, ta 1’or di merdia dia prome di januari di e respectivo aña. Un decreto cu ta data di 2020 tambe ta mustra esaki claramente. Pero esaki parce di no ta wordo respeta y atrobe hopi tabata e kehonan drentando di ciudadanonan cu tabatin problema cu e tiramento excesivo di klapchi, despues di ora. Mayoria di nan, tabata dirigi nan keho den cuadro di e mascotanan cu tin cu soporta e sonidonan duro y cu ta hinca nan den estado di panico. 

FECHA OFICIAL PA TIRA KLAPCHI

E fecha oficial pa tira klapchi, ta di dia 27 di December pa 1 di januari di e siguiente aña, pa 1’or di merdia. No ta permiti pa tira prome ni despues di e fecha aki y por haya un multa pa esaki. Sinembargo, ciudadanonan tabata haci como si fuera no tin regla ni ley, y tabata tira te hasta mas klapchi despues di dia cu ta permiti, y mas aun, te laat di anochi. E aña aki, dia 2 di januari anochi casi mei anochi, ainda tabata zona klapchi tur caminda. Un yamada na polis, a resulta den un comentario cu ‘ta dificil pa actua’, pues cu practicamente no por haci nada aunke cu tin ley. 

KEHO CONTRA KLAPCHIDen pasado, e portal aki a tene encuesta entre su lectornan, unda cu ta midi e pensamento riba e tema aki y unda cu a resulta cu e pueblo ta dividi casi mitar, unda cu mitar ta pensa cu mester stop cu tira klachi, mientras cu e otro mitar ta sinti cu e ta parti di nos cultura y cu no mag mishi cu e ‘tradicion’ aki. Tambe a midi si ta ok pa tira klapchi riba solamente un dia, manera entre dia 31 di December y 1 di januari.