Aruba ta keda ‘dividi’ riba e aspecto di tiramento di klapchi

ORANJESTAD – Aruba ta keda dividi riba e aspect di tiramento di klapchi. Un encuesta cu Noticiacla.com a tene durante cambio di aña riba e tema, a duna como resultado cu entre e grupo encuesta, un mayoria (59%) a vota pa trece cambio den esaki, mientras cu e resto (41%) ta haya cu tur cos mester keda manera e ta. E opcion tabata si 1. Mester limita e tiramento di klapchi riba un solo dia (31 di December/1 januari) y 2. Laga e situacion manera cu e ta, esta di 27 di December pa 1 di januari di e siguiente aña. E encuesta no ta official pero cu 2 mil 600 participante, si ta un bon indicacion kico e sentimento eyfo ta. 

ENCUESTA

E motibo di e encuesta ta pa e hecho cu tin un grupo creciente cu tin problema cu e tiramento di klapchi, y mas e cantidad di dia, y cu e problemanan cu esaki ta trece cu ne. Entre nan, limita e dianan ta limita tambe e chens pa accidente tuma lugar cu esnan cu ta tira klapchi, y tambe e molester cu esaki ta crea pa un cantidad grandi di bestia. Mes momento mester bisa cu e aspecto aki a keda limita caba e aña aki cu ‘apenas’ 2 persona tabata ‘afecta’ pa motibo di klapchi. Loke no a yuda, ta cu tabatin un ‘abundancia’ di klapchi atrobe y cu esaki ta birando un problema pa autoridad pa cu e wardamento di esaki despues di e cambio di aña. Nota cu e encuesta su intencion no tabata pa para e tiramento di klapchi completo, pasobra esey lo ta un extremo. Manera cu na Hulanda, prome minister Mark Rutte a bisa, mayoria di Hulandes ta tira klapchi netchi, pero tin un grupo (grandi) di idioot, no por haci normal y ta daña pa otro. Y ora cu e grupo aki bira mas grandi, mester interveni. 

HULANDA

Interesante ta e pensamento na p.e. Hulanda, unda cu durante un conferencia di prensa di gobierno, e tema ey a domina e conferencia unda cu gabinete kier limita tiramento di klapchi debi na e forma con esaki a tuma lugar atrobe e cambio di aña aki. E intencion segun e prome minister di Hulanda Mark Rutte, no ta pa para e ‘tradicion’ completo, sino pa limita esaki pa tin menos problema. E intencion di Hulanda ta pa fin di e aña aki caba e cambionan menciona, drenta na vigor.