Van Huffelen:” Ta bon cu Parlamento di Aruba a bay di acuerdo cu ley nobo di LAFt’

DEN HAAG – “Ta bon cu Parlamento di Aruba a bay di acuerdo cu e (ley nobo di supervision financier:red) LAFt”. Asina secretario di estado Hulandes Alexandra van Huffelen a reacciona diamars mainta pa Noticiacla. “ Pa e pueblo di Aruba, esaki ta bon noticia. Esaki ta e prome paso cu mester pa un interes reduci” e mandatario a sigui bisa, refiriendo na e hecho cu esaki no ta nifica cu e hecho cu a aproba e ley, so ta suficiente pa logra e interes abou.

PROXIMO PASO

E mandatario a sigui splica cu mester cumpli cu un punto mas pa por keda cla. “E proximo paso ta cu hunto cu Aruba nos por yega na un acuerdo gubernamental pa un Rijkswet pa un supervision financiero. Gobierno di Aruba por evita asina cu Arubianonan innecesariamente mester paga hopi pa e prestamo di Covid” e mandatario a sigui bisa. 

CARTA PA TWEEDE KAMER

Tabata interesante cu riba e mesun dia cu Parlamento di Aruba a trata e ley di LAFt, cu e secretario van Huffelen a manda un carta pa Tweede Kamer riba e tema ey, recordando cu mientras cu Parlamento di Aruba tabata poni pa trata e ley dialuna tambe, cu esey so no tabata suficiente pa logra cualifica pa haya interes abou pa e prestamo di Covid. Algun Parlamentario durante e tratamento di e ley, a usa e carta aki di e secretario Hulandes, recordando e prome mandatario di e realidad y pa ‘evita’ cu e mandatario lo a crea e impresion eroneo cu e ley aki so, tabata suficiente. Pero e mandatario tambe a confirma cu enberdad no ta e ley so ta logra e interes abou, sino e acuerdo gubernamental riba e Rijkswet. Esaki aunke cu tanto Parlamento di Aruba como gobierno, no ta pro pa un Rijkswet.