Restriccion di espacio aero cu Aruba ta motibo di retraso di concierto di Santos na Venezuela

CARACAS – Restriccion di espacio aereo cu Aruba, ta motibo di e retraso di e concierto di Romeo Santos na Venezuela. Asina e compania productor Panteras Entertainment, a bisa dialuna. E compania a disculpa su mes un dia despues pa e tardansa cu a surgi diadomingo cu a pone cu (mescos cu na Aruba) e concierto a cuminsa apenas 4 or di dialuna marduga. “  Debi na e restriccion den e espacio aereo entre Aruba y Venezuela, e avion charter encarga cu transporte di ekipo y instrument di Romeo Santos, mester a sigui un ruta indirecto, pasando pa Republica Dominicana” e ta cuminsa bisa. “E avion a wordo someti na un revision exhaustivo pa autoridad di e pais. E revision inespera a resulta den un retraso significativo, ya cu a rekeri pa desembarca y examina mas di 1.700 kilo di ekipo, incluyendo 80 reki y 102 maleta cu instrument. E proceso aki a conclui casi mei anochi, permitiendo porfin pa nan sali pa Caracas” e productora a bisa. Den e comunicado publica dialuna, e productora a splica cu e cantante a yega Caracas 10’or di anochi, via un ruta alternativa via Corsou. 

ROMEO SANTOSRomeo Santos mientrastanto mes dialuna marduga riba scenario na Caracas, a habri afo contra e productora, catalogando e como iresponsabel. Mes momento, contrario na loke e la haci na Aruba, e la bisa cu e biaha aki e lo no tabata diplomatico. Na Aruba e la usa idioma mas diplomatico pa splica e situacion cu a surgi unda cu aki tambe e concierto a cuminsa apenas 4 or di marduga di diadomingo, envez di anochi 10’or.