Premier Wever ta sostene discurso di colega Maduro cu a causa consternacion

ORANJESTAD – E discurso diasabra ultimo na Hulanda di minister Xiomara Maduro durante e evento di Genootschap Nederland Aruba cu a hala asina hopi atencion, ta conta cu sosten di gobierno di Aruba y prome minister Evelyn Wever. “Si, mi ta sostene”. Asina e prome mandatario a confirma na periodista Tito Laclé durante e programa en bibo Noticiacla LIVE diaranson anochi. E tabata na altura di e contenido y cu a papia riba esaki recientemente caba. Ademas e mandatario no ta kere cu e contenido lo tin efecto negativo riba e negosacionan cu ta andando actualmente entre Hulanda y Aruba riba e cambio di ley di LAFt y reduccion di interes pa paga riba e debe di Covid.

E DISCURSO

Manera ta conoci awor, minister Maduro a hiba un discurso na e evento diasabra atardi, di 6 pagina, pero cu e parti casi final di dje, a hala hopi atencion y sorprende hopi tanto eynan den e sala como aki na Aruba. Sigur e parti unda cu ta reclama Hulanda pa e trato cu nos ta hayando di un banda, mientras di otro banda kier papia di despensa pa tempo di sclavitud. Den e discurso, entre otro e mandatario a bisa cu e despensa ofreci ta perde su balor. Durante e discurso, Minister Maduro a recorda esnan presente riba e reaccion di Prome Minister sra. Evelyn Wever-Croes riba e despensa ofreci pa sr. Mark Rutte den nomber di Estado Hulandes dia 19 di december 2022 cu ta bisa, 'een welgemeend excuus is altijd welkom.' Cu e trato cu Aruba a haya den e negosacionnan pa refinancia e debe di e pandemia y e 'strafrente' duna, e esencia di e despensa ta perde su balor. 

PARA TUR TRABOU TOT NADER ORDE

Tambe e parti cu a hala atencion ta cu ta para tur trabou te proximo aviso. Tabata na final di e discurso cu Minister Maduro a informa esnan presente cu Ministerio di Finansa y Cultura lo no forma parti mas di e agenda pa conmemora e abolishon di sclavitud den Reino Hulandes. Ta para tur trabou 'tot nader orde.' Motibo principal pa esaki ta e manera di trata cu otro den e negosacionnan pa refinancia e debe di e pandemia, y e 'strafrente' di 300 miyon florin cu e Pueblo di Aruba ta haya pa paga pa un yudansa basa riba articulo 36 di Statuut.

REACCION PROME PROME MINISTER

Prome minister den e programa diaranson anochi a lamenta cu mester a yega asina leu pa bisa cu Aruba tin cu bisa cu e no ta sigui cu e proceso manera Hulanda a encamina. E programa di Aruba ta continua, pero esun hunto cu Hulanda no. Ademas sra Wever a bisa cu e ta haya cu colega minister Maduro tabata hopi diplomatico. “Si mi ta sostene”, tabata e contesta di premier Wever riba e pregunta di periodista Laclé, si e ta sostene e declaracion na Hulanda di e minister colega. “Nos tabata papia di esaki na varios ocacion prome cu e la bay Hulanda, y na Hulanda tabatin un 4 landen overleg y eynan caba e la trece padilanti” sra Wever a bisa. “E no ta afecte”, sra Wever a bisa riba e tema di e ta afecta e negosacion. “A describi con e negosacion ta bay. E no ta algo nobo. E ta algo cu a wordo bisa pa prome biaha duro” Wever a sigui bisa. E ta sigura cu e mes a bisa esaki tambe hopi biaha tras di cortina pero si cu Hulanda. “Mi no ta kere cu e ta bay afecta e negosacion” e mandatario a sigui bisa.