Omtzigt: Pone condicion estricto pa islanan CAS fia placa di Hulanda!

DEN HAAG  - Cu un eventual  cambio di gobernacion Hulandes, no mester spera automaticamente cu esaki kier men cu e gabinete lo ‘suavisa’ nan forma di anda cu nos pa loke ta prestamento di placa, manera cu e situacion ta aworaki. Un di e politiconan mas popular di Hulanda aworaki, Pieter Omtzigt a publica e programa politico di su partido Nieuw Sociaal Contract (NSC) awe mainta na Hulanda unda cu tin un parti chikito, pero importante dedica na nos islanan. Aki por lesa e.o. cu mientras cu gobierno Hulandes tin un relacion special cu e islanan di Reino den Caribe, ora di fia placa, mester pone condicionan estricto pa e islanan aki. Asina e lider politico Omtzigt ta bisa awe den su programa politico presenta awe mainta. Pues den un paragrafo chikito, pero cu palabra fuerte, e ta duna un indicacion di kico por spera di dje pa cu e islanan aki. 

RELACION SPECIAL

“Nos ta sinti un relacion special cu e paisnan autonomo Aruba, Corsou y St Maarten dentro di Reino Hulandes, y cu e islanan Saba, Sint-Eustatius y Bonaire cu ta forma ‘Caribe Hulandes”, e programa ta bisa. Segun e programa, gobierno Hulandes mester asumi responsabilidad comparti pa e partinan aki di Reino, cu ta wordo afecta mas fuerte pa inflacion y cambio di clima, compara cu otro partinan di Reino. “Esaki kier men no solamente ayudo financiero, pero tambe condicionan pa fortificacion di gobierno, y ofrece sosten pa creacion di un modelo di propio entrada”. Ademas e programa ta bisa cu ‘Pa prestamento di placa ta pone condicion estricto!”, indicando cu no ta bay fia placa sin mas y ta algo cu ta cuadra cu e gabinete actual ora cu ta fia placa. Por interpreta cu si gobierno cambia di signatura mes, no mester spera cu lo suavisa e forma di presta placa. Por lesa e programa completo AKI.