Corte: Medida disciplinario y retiro di Besaril como minister ta hustifica

ORANJESTAD – E medida disciplinario condiciendo na retiro di Guilfred Besaril como minister plenipotenciario na Hulanda ta hustifica segun sentencia di huez di LAR dialuna mainta. Mester bisa mes momento tambe cu di e 18 acusacionan cu gobierno a usa pa hustifica e medida disciplinario y retiro, huez a aproba ‘solamente’ 4, pa cua Besaril a viola su funcion como minister. Esaki sinembargo tabata mas cu suficiente pa Corte duna Gobierno razon den su decision pa retira Besaril conforme e decision di 9 di januari di e aña aki pa retira e ex mandatario. 

E CASO

Tabata na comienso di e aña aki, na januari 2023 unda cu gobierno a informa Besaril di e medida disciplinario, resultado den su retiro di funcion, aunke cu e mes a tuma retiro di e funcion na juli di 2022. Manera informa anteriormente, gobierno a cita por lo menos 18 infraccion variando di pagonan no autorisa pa e.o. vacacion persona, ten a remodelacion di su cas na Hulanda. Huez a acepta solamente 4 punto, entre nan, cu Besaril a malusa fondo durante su vacantie na Aruba na December 2020 unda cu e la p.e. paga hotel, y declara cierto gastonan priva maneera huur di auto como gastonan di trabou, y finalmente, declara gastonan medico di su casa y restitui su casa e sumanan aki, siendo cu ta fondo di gobierno y cu e no tabatin derecho pa haci. Na tur, pues 4 acusacion, di un total di 18.  E defensa di Besaril cu e no tabata na altura cu cierto di e gastonan e no por a haci, y a haci comparacion cu e.o. e funcion di minister plenipotenciario di Washington. Sinembargo, huez a rechasa tur esaki, bisando cu e funcion na Washington no ta uno politico pues no tin comparacion. 

Mientras cu e sentencia por wordo ehecuta mesora, Besaril por apela esaki tambe. Pa e sentencia y e caso completo, click AKI.