CAFt: Gobierno mester introduci BTW a corto plazo, ‘manera anuncia’

ORANJESTAD – Mientras cu gobierno a dicidi pa wanta introduccion di BTW pa tempo indifini, y pone un BBO na frontera como su reemplasante, durante e bishita di CAFt e siman aki, nan (CAFt:red) a bolbe insisti na gobierno pa ‘introduci BTW a corto plazo, manera previamente a keda anuncia’. Segun e colegio di supervision, Aruba a tuma prome bon paso pa haci su sistema fiscal mas robusto cu e Plan Fiscal 2023, pero e sistema di belasting indirecto ta keda fragmenta y door di esey innecesariamente compleho. Colegio di supervision financiero di Aruba (CAft) ta sigui encurasha, conforme e Pakete Nacional y e recomendacionnan di IMF, pa simplifica e sistema di belasting indirecto y introduci Impuesto riba Balor Agrega (IBA/btw) riba corto plaso, manera previamente anuncia. Un sistema mas simpel tambe lo beneficia cumplimento fiscal. Ta importante pa Aruba aumenta cumplimento fiscal pa garantisa un distribucion di carga mas ekilibra y asina ei crea espacio presupuestario adicional pa mas inversion cu ta fomenta crecemento.