Diputado Thielman: Sorprendi, y ta lamenta caida di gobierno na Bonaire

KRALENDIJK – E accion di awor ex miembro di partido MPB Cyril Vrolijk cu a resulta den caida di gobierno na Bonaire a gara partido MPB completamente di sorpresa. Asina e diputado di e partido Hennyson Thielman a bisa noticiacla.com diaranson mainta den su prome reaccion di e caida di gobierno. “E ta lamentable. Jammer cu esaki a pasa. Nos no a verwacht e. No ta algo cu nos a spera” e diputado ta sigui bisa. Segun e diputado, no a haya ningun señal di e miembro di partido Vrolijk, cu e tabata rabia, of cu tabatin malcontento. Segun e diputado, Vrolijk tabata ausente di Bonaire pa basta tempo pa salud, y e partido no a haya ningun indicacion cu e tabata rabia cu e partido. 

PARTIDO A HACI HOPI

Segun e diputado, e partido a haci hopi pa e pais, sigur den e ultimo 6 luna di e 7 cu nan a sinta, mencionando e.o. drechamento di caya, traha pista di drift, a logra aproba un declaracion di accountant di e cuentanan di e pais, y asina ta menciona hopi logro. “Ta un cos lamentable cu ta para tur esakinan, pa aworaki cuminsa cu un rumbo nobo, un aventura nobo pa wak kico nan por bin cune. Esey ta jammer. Jammer pa tur cos cu tabata den tapara tambe” Thielman a bisa.