Corsou ta anota cinco gol pa gana di Trinidad & Tobago

WILLEMSTAD - Selekshon di Kòrsou ayera a efektuá nan último wega di e edishon aki di CONCACAF Nations League. Esaki ora ku nan a topa ku Trinidad & Tobago. Kòrsou a sa di sera nan partisipashon ku un viktoria di 5-3 kontra Trinidad & Tobago. Kòrsou a kuminsá e wega aki kreando for di trempan oportunidat. Esaki a trese kuné ku na di 7 minüt Rangelo Janga ta manda Kòrsou ariba ku skor di 1-0, Djis un ratu despues Godfried Roemeratoe ta hasi e wega 2-0. Esaki tabata e promé di Roemeratoe pa selekshon di Kòrsou. Kòrsou a sigui krea mas oportunidat pero no a konkretisá esakinan. E wega a bai sosegá ku Kòrsou gana ku skor di 2-0.

Den e di dos tempu kos a sigui meskos ku Kòrsou ku e mihó parti di wega. Na di 56 minüt Kenji Gorré ta amplia pa Kòrsou, ora ku el a anotá un pinalti.

Despues di esaki Trinidad & Tobago a drenta e wega. Nan tabatin nan mihó aktuashon pa loke ta trata e wega aki. Nan a sa di anotá na di 68 i 74 minüt pa hasi e wega 3-2 ainda na fabor di Kòrsou.

Na di 76 minüt Kòrsou a haña otro pinalti. E biaha aki Brandley Kuwas a para tras di e bala. E  futbolista pia robes a faya e pinalti aki, i wega a sigui 3-2.

Pero un ratu despues na di 78 minüt Kòrsou a haña su di tres pinalti di wega. Akinan e saminero Juninho Bacuna ta tuma e bala i ta deposit’é den gol, pa manda Kòrsou ariba ku skor di 4-2. Miéntras ku Rangelo Janga ku a anotá e promé gol di e wega pa Kòrsou, a sòru pa e último gol tambe. Esaki ora ku na di 81 minüt el a anotá e di sinku pa Kòrsou.

Trinidad & Tobago a hinka un gol mas na di 86 minüt, pa asina e wega finalisá den un viktoria di 5-3 pa Kòrsou.

No opstante e resultado  Trinidad & Tobago ta klasifiká pa kuart final di CONCACAF Nations League. Miéntras ku Kòrsou ta keda na penúltimo den nan grupo, i ta degradá pa Liga B.

Kòrsou a para un racha largu sin viktoria

E viktoria di ayera tabata e promé pa selekshon di Kòrsou for di 6 di yüni 2022, ora ku nan a gana Honduras ku skor di 2-1. Miéntras ku ta e promé wega ku nan a hinka sinku gol mas den un wega for di 5 di yüni 2021, ora nan a gana British Virgin Islands ku skor di 8-0. NOTA: Texto ta scirbi den Papiamento fonetico di Corsou.