Q. Kelly: Mañan Van der Sloot lo comparti detaye di desaparicion di Natalee

BIRMINGHAM – Famia di Natalee Holloway, e mujer cu a perde na Aruba na 2005, a informa prensa Mericano cu e sospechoso principal di su desaparicion, esta Joran van der Sloot lo revela con e dama di Alabama a fayece. E abogado di famia John Q. Kelly a informa NBC diadomingo cu parti di e deal di diaranson mainta unda cu vd Sloot lo declara su mes culpable di extorsiona e famia di Holloway, ta cu e mester revela e detayes di e desaparicion tambe. “E (deal) tabata condiciona pa sr van der Sloot comparti detayes di con Natalee a fayece y con a deshaci di su curpa” Kelly a sigui bisa. 

DEAL DIARANSON

Manera cu Noticiacla a raporta caba, van der Sloot y Fiscal Mericano a yega na un acuerdo unda cu van der Sloot lo declara su mes culpable di extorcion, a cambio di un sentencia di prizon reduci. Awor ta resulta, segun e abogado di famia Holloway, cu van der Sloot lo revela mas informacion. Van der Sloot mester presenta dilanti huez diaranson (mayan) mainta pa 10’or y mei ora di Aruba. Tin di wak si enberdad van der Sloot lo revela e detayes cu e famia Holloway ta bisa cu lo bin dilanti. Van der Sloot den preparacion di e deal, mester a tuma un test contra gañamento, e asina yama ‘lie detector test’. Esaki e la pasa cu exito cu a pone cu autoridad Mericano a dicidi di sigui cu e ‘plea deal’. Asina cu van der Sloot termina cu e caso, e lo mester bolbe Peru pa caba sinta su castigo di prison.