Van Huffelen: Aruba a rechasa oferta pa reduci interes automaticamente ora tin acuerdo

DEN HAAG – “Aruba a deshaci di e oportunidad ofreci di Hulanda, pa automaticamente reduci e interes, ora cu ainda logra un acuerdo pa un ley di reino unda cu e supervision financiero ta regla y un Landsverordening Aruba financieel toezicht (LAFt) revisa drenta na vigor”. Asina secretario di estado Hulandes Alexandra van Huffelen a informa Tweede Kamer den un carta dos dia pasa. Den un otro raportahe, premier Evelyn Wever Croes ta confirma esaki pero ta splica tambe mesora pakico a rechasa e ‘oportunidad’ aki. 

E CARTA

E carta di Van Huffelen tabata describe e situacion mas actual di e refinanciamento pa Aruba, Corsou y St Maarten. Y den e parti di Aruba, a hala atencion e parti aki. “Pakico e (premier Wever:red) a haci esaki, no ta conoci pa nos”, vocero di e secretario a bisa Noticiacla. Segun Van Huffelen, e ta raporta cu tanto riba nivel di ambtenaar como gubernamental, a sigui papia riba e acuerdo di prestamo cu e la ofrece na Aruba. “ E combersacionan aki a conduci na cierto adaptacionan, cu mi a implementa riba peticion di Aruba” e mandatario a sigui bisa. “E resultado ta cu a logra pa yega na un acuerdo cu Aruba pa un refinanciamento riba teremino largo”. A splica cu e programa di pago bek, ta uno linear envez di annuitario. E diferencia ta cu na un prestamo annuitario, e suma di e pago ta keda igual tur luna, mientras cu esun liniear, e interes na comienso ta mas halto cu e pago final. Mientras cu Aruba a deshaci di e oportunidad ofreci pa Hulanda, Hulanda ta keda dispuesto pa den e situacion ey ainda papia riba e reduccion di e porcentahe di interes, conforme e oferta haci pa Hulanda. Lesa e carta di Van Huffelen riba e tema AKI.