Huez a disolve contracto laboral entre Respaldo y su director operacional

ORANJESTAD – Huez a disolve e contracto di e director di operacion di Fundacion Salud Mental Aruba, esta Respaldo entrante awe, sin compensacion. Asina e sentencia ta mustra despues cu den prome instante, corte di prome instancia a duna e director en cuestion, dr Lex de Jong razon. E motibo Respaldo kier a retira e director operacional, ta pasobra e no tabata presta conforme e rekisitonan di trabou. E problemanan a cuminsa for di 2019, dos aña despues cu e la keda apunta pa e funcion en cuestion. Abogado pa Respaldo tabata David Kock y pa de Jong, Richie Kock. 

E CASO

Ta for di juli 2019 cu e problemanan a cuminsa ora cu de Jong a haya un carta di advertencia riba su prestacion, mas concreto, entrega laat di cifranan financiero. Na final di 2021 un grupo di specialista di e centro a entrega un manifiesto, criticando e funcionamento di hunta di comisario, primordialmente de Jong. Y na augustus di 2022, hunta di supervision kier a termina e relacion di trabou cu de Jong entrante februari di 2023, esta e aña aki. Algo cu de Jong no a acepta y a bringa den corte y a gana su caso na mei di 2023. Esey a pone cu Respaldo a pidi e ora e permiso di departamento di labor pa termina e relacion di trabou cu de Jong, argumentando cu debi na tur e loke a sosode, no tin confiansa mas cu e persona aki y pa e no haya compensacion cu e terminacion aki. De Jong a bringa esaki, y a pidi pa pag’e un suma pa e terminacion di trabou, y gastonan di e caso mesora cu dicta e sentencia. Corte a evalua tur punto y a deduci cu tur e loke a sosode desde cu a raporta e prome problema, tur e intentonan haci pa duna de Jong un oportunidad pa drecha e situacion, no a duna e resultado desea. Ademas e reclamo di personal y coleganan a haci e situacion dificil pa por continua un relacion di trabou drechi. Y pa loke ta e peticion di suma di compensacion na de Jong, corte a deduci cu mirando e situacion cu de Jong tabata aden, esta cu e no a traha na Respaldo mas, for di augustus 2022 y toch a haya su salario paga completamente te awor, ta pone cu e derecho cu e lo tin pa haya cualkier compensacion awor, ta nihil, esta zero. Corte ta haya de Jong grandemente culpable y como tal a aproba e peticion di Respaldo pa disolve e contracto di trabou entrante awe, sin compensacion. Por lesa e sentencia completo AKI.