ELMAR: Tempo calor ta causante di problema di coriente na Aruba

ORANJESTAD – E problema casi diario di coriente cu Aruba ta experenciando den varios bario of districto, ta consecuencia di e tempo calor cu tin actualmente riba nos isla. Asina e vocero di e compania Audrey Croes ta bisa Noticiacla. Hopi a pensa cu e problema por tabata falta di mantencion of cu e tabata e efecto di e trabounan riba e kabelnan grandi subteraneo di 60kv cu a sufri daño recientemente. Pero esaki no ta e caso segun Croes, pasobra e trabounan ey a keda cla caba.

HOPI CALOR TA CAUSA PROBLEMA

“Locual cu nos ta confrontanto actualmente ta e tempo cu ta causa corto circuito riba e infrastructura, sea temperatura haltisimo cu ta keinta e kabelnan subteraneo of humedad halto cu ta afecta e instalacionnan di coriente den transformerhuizen” Croes ta bisa. Pues por compronde e ora cu mientras cu e calor ta sigui, por sigui spera tipo di problemanan asina.

TRABOU FINALISA RIBA ONDERSTACION

Manera a indica caba, e problema di coriente no ta un resultado di e trabounan riba e kabelnan kibra.” Nos a finalisa e trabounan na Onderstation Sabana Blanco, esta e trabounan di reparacion riba e kabel di 60KV cu a sufri daño y trabounan di inversion pa e Onderstation nobo na Sabana Blanco” Croes a finalisa bisando. No ta conoci si kico por haci pa mitigua e problema aki mientras cu e tempo keda calor. 

PROBLEMA DIARIO

E problema di coriente a cuminsa bira algo casi diario, unda cu casi tur dia tin problema cu coriente den un of otro barrio of districto. Y esaki ta los di e interupcionan anuncia delanta. Loke no ta yuda ta e accidentenan cu tambe a aumenta semanalmente unda cu automobilistanan ta dal contra un of otro palo di luz y ta destrui esaki di tal forma cu e ta afecta e coriente den e respectivo bario of districto, of mas pio, henter un parti grandi di e isla.