DUCAPRO ta organiza simposio riba derecho di autor otro siman na Aruba

ORANJESTAD - Derecho di autor ta inclui cu e autor por exigi pa wordo compensa pa e uso di su creacion. Asina e organisacion DUCAPRO ta informa e siman aki. Segun DUCAPRO, e problema ta cu cada autor individual dificilmente por corre tras di cada usuario di musica pa pidi compensacion pa e uso di su creacion especifico. Den un disputa e lo mester prueba tambe cu e usuario realmente a usa su creacion, mientras cu e gastonan pa cobra pa cada uso individual ta surpasa cualkier cobro individual. Pa e motivo ey no tin sentido financiero pa un autor haci esaki.

Pesey rond di mundo tin instancianan cu ta representa gruponan di autor pa asina empodera e artistanan formando un frente contra di e usarionan commercial di musica. E instancia aki e ora ta negocia cu e usadornan commercial den number di tur autornan, cera contrato di licencia pa asina cobra pa tur e autornan.

Casi tur pais tin un of mas instancianan asina, mescos cu BUMA/STEMRA na Hulanda. E instancianan aki ta cera acuerdonan internacional y asina ta haya representacion di tur artista nacional y international. Di e forma aki BUMA/STEMRA na Hulanda ta representa artistanan rond di mundo aunque nan no ta miembro di BUMA/STEMRA. Den e ambito internacional e instancianan aki ta uni den CISAC cu ta e organisacion cu ta acapara y ta supervisa tur e instacianan international cu ta representa autornan musical.

Na Aruba te cu awor no tabata existi un organicacion asina, pero esey a cambia cu introduccion di DUCAPRO cu ta mescos cu tur otro organisacion mundial. Pa esaki DUCAPRO a cera un acuerdo cu BUMA/STEMRA pa asina representa tur artista mundial, ya cu BUMA/STEMRA tin acuerdonan firma cu tur otro organizacion mundial na cual un artista ta registra. DUCAPRO tambe ya ta miembro provisional di CISAC.

Fuera di cobra pa artistanan internacional DUCAPRO lo cobra tambe pa cada artista local cu bira miembro pa e uso comercial. Mirando cu miembronan local lo tin diferente beneficionan compara cu artistanan internacional, lo ta atractivo pa e autornan bira miembro di DUCAPRO. Mas informacion riba e introduccion di DUCAPRO lo wordo duna durante un symposio organiza dia 14 oktober 2023 pa 10or di mainta na Caribbean Cinemas na Paseo Herencia. E oradornan lo ta di BUMA/STEMRA, CISAC, Association of Caribbean Copyright Societies como tambe AMA (Associacion di Musiconan di Aruba).  E entrada ta gratis y por registra na: www.eventsducapro.com ya cu e stoelnan ta limita