Ciudadano ta perde su di dos pushi den dos luna di tempo na man di 3 cacho brabo

ORANJESTAD - Dialuna ‘un biaha mas’, tres cacho ( 1 Jack Russell y 2 Pitbull)  a mata un pushi na Aruba den cura di un ciudadano. Un biaha mas pasobra esaki a sosode den pasado caba. E ciudadano a remarca cu algo asina cu e mesun cachonan a sosode caba luna pasa, den augustus cu un otro pushi di dje. Tambe cu tabatin otro caso di un otro bisiña unda cu aki tambe e pushi no a sobrevivi e operacion cu mester a haci riba dje despues di e atake di e cachonan. 

PROMESA BASHI

Segun e ciudadano, e doño di e cachonan cu a causa e atake, a priminti shelo y tera cu e lo percura pa haci lo necesario pa e cachonan no por sali for di su cura. Pero  asina mes esaki a keda pasa na mas cu un ocasion y cada bez e no ta para responsabel pa su actonan. 

EXPERIENCIA

“ Fuera cu e cachonan a mata e pushi ultimo den mi cura (mi cura no ta cera) esakinan por poco a ataca mi mes ora mi a yega den mi cura, paso tabata net ora cu mi a yega cas, cu e incidente a tuma lugar” e ciudadano ta sigui conta. “ Mi mester a benta bais abou y bula drenta mi baki pick up pa nan no a morde mi”, e ciudadano a sigui splica. 

KEHO

Segun e ciudadano, varios keho a wordo entrega caba na polis di bario.” Y spera cu esaki ta ultimo biaha e cachonan aki ta haci esey. Jammer pero nan no por keda na bida mas. Mi no ta pro pa mata bestia pero si ami a wordo ataca door di e bestianan ey y keda cu pia na werki, mi ta wonder cual ley lo proteha ami” e ciudadano a sigui bisa. Y su ultimo mensahe tabata uno importante” Si bo tin cacho brabo zorg pa nan keda den bo cura!!”.