Lider di Groenlinks/PvdA cuestiona pa a libera Hugo Carvajal na Aruba na 2014

DEN HAAG – Ex minister y actual lider nobo di partido politico Hulandes Groenlinks/PvdA Frans Timmermans ta wordo cuestiona pa un Parlamentario Hulandes pa su decision di ‘unilaterlamente’ dicidi pa laga e ex general Venezolano Hugo ‘El Poyo’ Carvajal liber na Aruba den 2014 despues cu esaki tabata deteni riba peticion di Merca. Mirando cu Timmermans (e tempo ey minister di Relacionan Exterior di Hulanda:red) tin e posibilidad pa bira e proximo prome minister Hulandes, parlamentario Van Haga tin duda den su cualidadnan basa riba e.o. e decision ey. Como tal e la manda un serie di pregunta na minister actual di Relacionan Exterior Hanke Bruins Slot riba e tema. 

E CASO

E minister actual a reacciona e.o. cu e conoce e caso di 28 di juli 2014, ora cu Timmermans e tempo ey a duna Aruba ordo pa libera Carvajal. E parlamentario a cuestiona e mandatario tambe riba e hecho cu e fiscal mayor di e tempo ey na Aruba Peter Blanken y e huez comisario Yvonne van Wersch, gobierno Mericano y DEA tabata hopi rabia cu e decision di Timmermans. Tambe si e tabata sa cu Blanken a cuestiona e decision ey  abiertamente, y a declara pa laga ta cla cu ta Hulanda a tuma e decision ey y no Aruba. “Ta fastioso cu Aruba ta wordo culpa pa esaki. Nos no kier wordo mira pa Merca como un partner no confinable” Blanken a bisa e tempo ey. E mandatario Hulandes a contesta simplemente cu e tabata na altura di e ‘cuestion Carvajal’ y e noticianan di esaki via varios medio di prensa. 

CUESTIONA TIMMERMANS

A puntra e actual minister si e tin e disponibilidad pa investiga pakico Timmermans e tempo ey, riba su mes, a dicidi pa laga Carvajal den libertad. A pidi pa e mandatario duna un splicacion detaya di e asunto. 

CONTESTA DI MINISTER

Segun splicacion di Bruins Slot, Carvajal tabata e consul Venezolano apunta pa Aruba y a keda deteni ora cu e la yega Aruba. A sigura cu husticia ta un asunto autonomo di Aruba. Pero cu relacion diplomatico y consulair, incluso inmunidad, ta responsabilidad y poder di Reino, osea e minister di Relacion Exterior. “Solamente e minister di Relacionan Exterior ta autorisa pa tuma un decision riba e tema” e mandatario a contesta. Ademas, Bruins ta sigura cu basa riba e tratado di Viena, riba relacionan consulario data for di 1963, mester a laga Carvajal den libertad. E problema ta cu tabatin duda den su status exacto ora cu e la yega Aruba y su immunidad, debi cu e nota di e consulado Venezolano, no a keda ricibi segun canalnan diplomatico. “Despues di e interpretacion legal di e situacion real, mi predecessor, despues di consulta cu coleganan envolvi, a yega na e conclusion cu Venezuela por a confia cu Carvajal, temporalmente te ora cu e decision cay riba e otorgamento of no di e permiso, por a fungi como consul general. E tabata disfruta por lo tanto, di immunidad cu ta Sali di e trabou di un consul general. Consecuentemente sinembargo, a base di articulo 23 di e tratado di Vienna, a declara Carvajal como persona non grata y e la bandona Aruba. Carvajal mientrastanto ta deteni na Merca, en espera di un huicio contra dje pa traficacion di droga pa Merca. Por lesa e carta completo AKI