Na Corsou ex minister y criminologo, drs. Stanley Inderson a fayece

WILLEMSTAD - Ayera nochi   e èks dirigente i eksponente di partido MAN i èks Minister di Salubridat, drs. Stanley Inderson, a fayesé. E notisia aki sin mas ta konmové e mundu polítiko, ya ku sr. Inderson pa hopi tempu tabata aktivo den polítika, semper komo un persona krítiko konstruktivo, un hende ku ta para pa prinsipio i hustisia. E tabata e promé Kriminólogo aki na Kòrsou.

Manera e mes a denominá su mes komo “Stan the Man” a para komo “the man” na kuna di diferente lei. Den e époka unda el a asumí e funshon di minister e tabata e motor tras di loke nos konosé awe komo Lei di Labizjan (AVBZ). E lei/fondo aki ta unu di karakter sosial, miéntras ku su entradanan ta ser usá eksklusivamente pa kubri gastu di personanan ku un malesa króniko òf esnan desabilitá.

Mas aleu tambe sr. Inderson tabata na kuna di introdukshon di e Lei di Bion ku defakto ta ofresé insentivo na dunadónan di trabou ku tuma hóbennan den servisio.

Manera  a introdusí bisando kaba, Stanley tabata un hòmber di prinsipio, i na aña 1996 siendo titular di Salubridat e tempu ei el a opta pa tene honor na su mes komo konsekuensia di problemanan ku a surgi i ku a kosta bida di kuater beibi den “couveuse” na Sehos. Ta gobièrnu (c.q. minister) ta esun responsabel pa i tin di garantisá un bon salubridat, i den e kaso aki el a konsiderá ku e mester a retirá komo tal.

Despues di un periodo largu komo dirigente di MAN, Stanley a fungi tambe komo dosente na Skol Humanista. Meskos ku hopi di nos, último añanan su salú a lag’é na kaya, i asina a bin pasa un periodo na Hulanda. Pero algun tempu pasá Stanley a regresá Kòrsou i asta a selebrá su 85 primavera.

Ku su morto, Stanley ta bai laga atras entre otro su yu muhénan Saran i Afiba, kendenan semper ta masha orguyoso di nan tata. NOTA: Texto ta scirbi den papiamento fonetico di Corsou.