Na Corsou Wardacosta a pone man riba boto di piscado cu 130 kilo di cocaina

WILLEMSTAD -   Djasabra den oranan di mèrdia  Warda Kosta a pone man riba un boto di piskadó yená ku kokaina. Ta trata di e boto di piskadó Rubio ku 2 hende lokal i riba dje tabatin 130 kilo di kokaina skondí.

Bosero di Warda Kosta Shalick Clement a konfirmá e hayazgo di mas òf ménos 130 kilo di kokaina. E boto a ser detektá pa e sistema di vigilansia di Warda Kosta i nan a nota moveshonnan dudoso ku e tabatin riba laman.

Esaki tabata motibu ku  Warda Kosta a bai dirèkt riba e boto i a guia esaki pa e drenta na haf di piskadó na Caracasbaai pa einan por a kontrol’é.

Informashonnan ku a logra kompilá ta indiká ku durante kontròl den e kompartimentu di drumi, nan kurpa a keda blanku na un material ku tabata parse fèrf resien. Esei a lanta poko sospecho ku a pone ku a pidi presensia di duana tambe pa bin ku e kachónan, pa wak si ta detektá kosnan ilegal riba e boto.

Manera e kachó a subi e boto, el a bira loko loko. Mes ora e tim a kuminsá plama na banda di e boto, ku e konsekuensia ku nan a haña e droganan skondí den e partinan na banda.  Riba e boto tabatin dos hòmber lokal, kendenan a bisa ku ta piská nan a bai buska. A resultá ku enbèrdat tabatin piská tambe riba e boto pero tambe e droga.

Polis a presentá i a hasi detenshon di e hòmbernan yu di Kòrsou. Ta trata di un kantidat supstansial di kokaina ku  nan tabatin riba e boto.

E boto despues a keda di tou i hibá Parera pa asina kaba di saka tur e merkansia ku despues a wòrdu destruí.

Ambos sospechoso a keda detené pa mas investigashon. NOTA: Texto ta scirbi den Papiamento fonetico di Corsou.