Segun encuesta, MEP lo haya mas voto sigui pa ACCION21

ORANJESTAD – Si tabatin un eleccion Parlamentario awe, mayoria di e 562 cu a contesta e pregunta ey den e ultimo encuesta di Noticiacla, esta 38% lo a vota pa partido MEP. Mes momento, ta interesante pa nota cu e opcion ‘Niun di nan’, a resulta e di dos mas selecciona, na 23%. Y e partido cu a haya menos voto, ta partido Pueblo Prome (PP), cu 0.18%. Un total di 568 persona a participa durante 4 dia, entre 27 di September pa 1 di October 2023. Mayoria tabata homber (70%) y esnan entre edad di 55-64 tabata esnan cu mas a participa, cu 32%. Y e districto cu mas a participa tabata Oranjestad (27%) y e districto cu menos atencion, tabata San Nicolas cu 9%. 

E RESULTADO

Pa loke ta e partidonan politico cu actualmente ta den Parlamento cu a haya mas ‘voto’ den e encuesta aki, manera ya anuncia, a resulta di ta e partido MEP cu 38%, sigui pa ACCION21 cu 14%. E otro partidonan AVP ta sigui cu 10%, MAS cu 7% y por ultimo RAIZ cu 5%. Cu esaki ta mustra cu entre esnan cu a participa den e encuesta aki, ACCION21 ta e partido number 2, sigui pa AVP, MAS y RAIZ. Y ta interesante mirando cu RAIZ ta e partido partner di partido MEP den e actual gobierno di coalicion. Por interpreta cu mientras cu MEP ta haya aprobacion, e satisfaccion cu RAIZ no tey, segun esnan cu a participa den e encuesta of cu entre esnan cu a participa, no tin hopi interes pa e partido aki, aunke e ta forma parti di e coalicion MEP/RAIZ. . 

A VOTA VS VOTA PA PARTIDO NOBO

Loke tambe ta interesante ta cu un grupo relativamente grandi (entre esnan cu a participa na e encuesta aki) ta mustra cu nan lo no vota pa e partidonan actualmente existente. E grupo aki a sali como number dos den e opcionan cu 23%. Di otro banda, esaki no kier men cu nan automaticamente lo vota pa un partido nobo, ya cu ora cu a haci e pregunta aki, 53% a bisa no na un partido nobo. Pero tambe interesante ta cu un gran mayoria di esnan cu a conterta e pregunta si nan lo bay vota, 88% a bisa cu si. 

DISCLAIMER

Noticiacla ta conciente tambe cu esaki ta un encuesta no cientifico, haci di forma digital y cu no tur hende tin acceso na e encuesta digital. Cu esaki, e resultado ta netamente un bista entre esnan cu ta lesa noticiacla y cu tin acceso na internet. Ademas, pa loke ta e partidonan grandi y tradicional MEP y AVP,   partido AVP a bisa semper abiertamente cu nan no ta kere den encuesta ajeno y den pasado semper a descurasha nan militancia pa participa. Banda di e dos partidonan aki, e resultado entre e otro partidonan ta esnan cu ta keda esun interesante. Keda pendiente pa e proximo encuestanan cu noticiacla lo presenta pa su siguidornan fiel.