AHATA a organisa entrenamento pa planificacion di maneho di crisis

ORANJESTAD - Aruba Hotel & Tourism Association (AHATA) den colaboracion cu Bureau Rampenbestrijding Aruba (BRA) a organisa e entrenamento di “Crisis Management Planner” pa su miembronan. E training di dos dia, facilita pa expertonan den maneho di calamidad di BRA, a duna 52 participante di diferente compania e oportunidad pa desaroya e habilidadnan critico cu ta necesario pa nabega un posibel calamidad. 

E programa di e entrenamento a enfoca riba con pa identifica reaccion, capacidad di recuperacion, escasez di recurso y con pa alinea e Plan di Operacion di Emergencia (EOP) di un compania cu e Plan Nacional di Emergencia di Aruba. E entrenamento a ricibi reaccion positivo y a entrega un certificacion na tur participante despues di a completa e sesionnan. 

Cu e entrenamento aki AHATA ta brinda su miembronan guia y apoyo pa sa maneha y recupera efectivamente di cualkier crisis y ta aporta na e siguridad di turistanan y tur trahado den e sector di hospitalidad y turismo den un caso di emergencia.