Entrantre otro luna Spirit Airlines ta aumenta su buelonan for di Fort Lauderdale pa Aruba

ORANJESTAD - Aeropuerto di Aruba diahuebs a anuncia un avanse significativo den e biahenan aereo entre Fort Lauderdale y Aruba. Recientemente Spirit Airlines a reafirma su compromiso di fortalece nan conexion cu Aruba door di amplia nan servicio desde Fort Lauderdale. 

MAS VUELO SEMANAL

Anteriormente, Spirit Airlines tabata opera e ruta di Fort Lauderdale - Aruba dos biaha pa siman, cu vuelo diaranson y diasabra. Na momento cu a mira e demanda creciente di biahe pa e isla, Spirit a tuma medida proactivo door di aumenta nan servicio pa asina cumpli cu e demanda pa Aruba. Desde dia 6 di september, Spirit a aumenta su servicio pa e isla, expandiendo di dos vuelo semanal pa cuater vuelo semanal. E itinerario nobo di vuelo ta diaranson, diahuebs, diasabra y diadomingo ofreciendo e pasaheronan mas flexibilidad den nan opcion di biahe. 

MAS EXPANSION DURANTE WINTER 2023-2024

Cuminsando dia 4 di october 2023, Spirit lo mehora nan servicio ainda mas door cu nan lo cambia di 4 vuelo semanal pa vuelo diario entre Fort Lauderdale (FLL) y Aruba. Lo opera e ruta cu un avion Airbus A321, proporcionando un capacidad di alrededor 228 asiento. Ta spera cu e expansion aki di Spirit lo genera aproximadamente 1.140 asiento semanal adicional di Aruba pa Fort Lauderdale, mehorando significativamente e conexion entre ambos destinacion. 

AMERICAN AIRLINES TAMBE TA AUMENTA VUELO

Ademas di e aumento aki riba e frecuencia di Spirit pa Florida, ta importante pa resalta cu American Airlines tambe lo opera un ruta pa Florida, specificamente Miami-Aruba, cu frecuencia dobel tur dia!

ITINERARIO DI VUELO 

E vuelonan di Aruba pa Fort Lauderdale ta sali di dialuna pa diabierna pa 3:30 pm y den weekend pa 5:15 pm. “E decision di Spirit di mehora su conexion cu nos isla ta e testimonio di e compromiso continuo di Aeropuerto di Aruba pa promove asociacion cu e aerolineanan y expande continuamente su alcance global”, asina Jo-Anne Meaux-Arends, Aviation Business Development Executive na AAA, a duna di conoce. 

TOCANTE SPIRIT AIRLINES 

Spirit Airlines ta un aerolinea lider di costo flexibel reconoci pa ofrece un balor excepcional den biahe aereo. Combinando disponibilidad cu un servicio excelente, Spirit a reinventa e experiencia di e aerolinea. Cu un flota moderno y eficiente den combustible cu ta opera mas di 650 vuelo diario pa 78 destinacion na Merca, Latino America y Caribe, Spirit ta duna e biaheronan e oportunidad pa explora mas cu opcion personalisa pa ekipahe, asiento, participacion di comunidad y responsabilidad social. Pa reserva bo siguiente biahe, subi www.spirit.com/.