Ministerio Publico a yega na acuerdo cu sospechoso Croes den caso Flamingo

ORANJESTAD - Ministerio Publico a informa diahuebs merdia cu recientemente e la cera un acuerdo di transaccion den e caso Flamingo contra e sospechoso Humprey Anthony Croes pa un suma di Afl. 25.000. Tabata na Maart di 2022 cu e la keda deteni como e di dos sospechoso den e caso aki. 

SOSPECHO DI SOBORNO 

Croes ta wordo sospecha di a soborna activamente un trahador di oficina di minister di desaroyo espacial, infrastructura y medio ambiente (ROIM) den e periodo di november 2017 te augustus 2020. E multa maximo cu segun Codico Penal di Aruba por wordo impone pa e delito aki ta Afl. 25.000. Por lo tanto, e total di e transaccion cu a wordo acorda ta igual na e multa maximo.

SUFICIENTE PRUEBA CONTRA CROES PA SOBORNBO

Ministerio Publico ta opina cu tin suficiente prueba contra Croes y cu e hecho di cual e ta wordo culpa por tambe wordo comproba. Considerando tur hecho y circunstancia, incluso e hecho cu no tin victima of partinan perhudica di kendenan nan interesnan lo por wordo perhudica dor di realiza un transaccion, Ministerio Publico ta mira e transaccion menciona como un solucion adecua pa Croes.

TRANSACCION AKI TA SOLUCION ADECUADO 

Ministerio Publico tambe a tene cuenta cu acuerdo cera den casonan similar. Ministerio Publico ta di opinion cu e suma total di e transaccion ta haci husticia na e hechonan y na e rol specifico cu Croes a hunga den e caso penal Flamingo. Tanto Ministerio Publico como Croes ta considera cu e transaccion aki ta un solucion adecua di e caso penal.

ACUERDO NO TA AFECTA E CASO

Ministerio Publico ta enfatiza cu e transaccion aki no ta afecta e curso di e proceso penal contra e otro sospechosonan den e caso. Si Croes no cumpli cu e condicionnan cu a wordo acorda, e tambe lo wordo cita pa huicio.