Van Huffelen: ‘Si nos no ta hasi nada, otro aña ENNIA lo tin problema ku pagamentu di penshun’

WILLEMSTAD - Sekretario di estado Alexandra van Huffelen djamars mainta den un rueda di prensa ku prensa Karibense di Reino Hulandes a duna mas detaye tokante fiansa di 1.2 miar Naf ku Hulanda ta ofresé Kòrsou pa yuda ENNIA. Segun Van Huffelen gobièrnu di Hulanda i Kòrsou ta preokupá tokante situashon finansiero di ENNIA. “Si nos no ta hasi nada, for di komienso di 2024 ENNIA lo tin problema pa paga tur hende nan penshun kompletu. No tin otro opshon, nos tin ku invertí e sèn den ENNIA. Si no, no por garantisá penshun mas.”

Segun Van Huffelen Hulanda ke fia Kòrsou  e sèn, i tambe un parti na Sint Maarten. “Nos no ta mira niun otro opshon.” Manera ta konosí Hulanda djamars a duna di konosé ku nan ta bai invertí hopi sèn pa kombatí pobresa den islanan Boneiru, St. Eustatius i Saba. Den e rueda di prensa Van Huffelen a splika ku esaki ta lòs for di problemátiko ku ENNIA. Pero e ta enfatisá ku ‘komo gobièrnu hulandes nos ta bisa ku ta hopi importante pa nos buska un solushon’.

Van Huffelen ta splika ku te ainda tin diferente kasonan den korte relashoná ku e kaso. “Si Ministerio Públiko tambe tin ku kuminsá un kaso penal, no ta un desishon ku Hulanda por tuma. Esaki ta algu pa gobièrnunan di Kòrsou i Sint Maarten. Nan por opta pa hasi denunsia kontra ENNIA, si nan ke.” NOTA: Texto ta scirbi den Papiamento fonetico di Corsou.