Van Huffelen: “Mi a ricibi solamente un (1) propuesta (di Aruba)!”

DEN HAAG – “Enberdad mi a ricibi solamente 1 propuesta y esey mi a haya enberdad e ultimo dia prome cu 1 di September (di Aruba:red) ”, secretario di estado Hulandes Alexandra van Huffelen a contesta Tito Laclé di Noticiacla diamars mainta den un entrevista cortico, riba e pregunta cuanto propuesta e la ricibi di Aruba riba e tema di RAFt. E mandatario Hulandes a papia awe diamars mainta cu prensa di tur 6 isla, prome cu e biaha pa New York, despues di a presencia e discurso di Rey Willem Alexander na occasion di apertura di aña parlamentario 2023/2024. Y un di e dos preguntanan haci pa Laclé tabata pa haya un clarificacion riba e loke premier Wever Croes a bisa ayera den su conferencia di prensa. 

INFORMACION INCORECTO DI VAN HUFFELEN

Durante e conferencia di prensa di premier Wever Croes un dia prome, e la bisa cu e secretario di estado Hulandes a duna informacion incorecto siman pasa. E mandatario ta referi na e declaracion na e portal aki unda cu e la sigura cu e la ricibi solamente 1 propuesta riba e caso di ley di Reino pa loke ta e supervision financiero RAFt, y esey tabata un dia prome cu e deadline a vende. “Pues bo no a ricibi mas cu 1, pasobra premier Wever a sigura cu e la manda por lo menos 10 propuesta” Laclé a puntra. “Segun mi, mi no a haya 10 propuesta. Mi a ricibi uno. Porta na nivel di ambtenaar tabatin cierto intercambio, pero ami no a ricibi ningun otro proposicion cu esun prome cu 1 september“ Van Huffelen a bisa.  

COMBERSACION NA NEW YORK

Van Huffelen a bisa tambe cu e ta spera di por sigui papia cu premier Wever na New York riba e tema aki, ya cu nan lo topa otro durante e reunionan di Nacionan Uni pa trece mas claridad.