Tjon: Persona deteni na Merca no ta doño di compania cu ta lease helicopter cu KPA

Tjon: Persona deteni na Merca no ta doño di compania cu ta lease helicopter cu KPA

Posted on 09/18/2023 3:14 pm AST | Updated on 09/18/2023 4:11 pm AST

ORANJESTAD – Tur cos ta ok cu e deal cu Aruba tin cu e compania Colombiano SADI pa loke ta e helicopter di polis. Por lo menos asina minister di husticia Rocco Tjon a sigura prensa dialuna mainta. E mandatario a bisa tambe mesora cu e la manda Parlamento un carta solicitando un reunion pa por presenta tur documentacion na Parlamento y aclaria e situacion actual cu a surgi den e fin di siman aki. E mandatario a referi na e declaracion cu Noticiacla tambe a publica diadomingo, unda cu lo a resulta cu e doño di e compania lo a entrega su mes na DEA na Merca pa traficacion di droga. E informacion ey a crea consternacion y cu a pensa cu esaki por tin implicacion serio pa Aruba, gobierno y polis. 

E SITUACION REAL 

E mandatario sinembargo a sigura cu segun su declaracion, tur cos ta ok cu e compania y cu no ta violando ningun regla. Ademas, e la sigura cu e persona cu a entrega su mes, no ta e doño ni accionista di e compania y no ta esun cu a firma e acuerdo cu gobierno di Aruba na April di 2019. Segun e mandatario, a firma e acuerdo e tempo ey segun procedura normal y conseho cu minister e tempo ey. Ademas a sigura cu e contracto firma e tempo ey tabata pa 5 aña y cu esaki pues ta vence na April di 2024. A dicidi cu lo forma un comision cu lo explora un plan prome cu e fecha vence, y wak si ta sigui cu e compania aki of ta busca otro. 

E NOTICIA DI NARCOTRAFICANTE

Pa loke ta e alegacion cu e compania lo ta meti den narcotraficacion, e mandatario a bisa cu e noticia actual, tabata circula ya caba for di 2022. Ora cu Aruba a tende di e informacion, mesora a haci un due diligence. Aki a bin sali na cla pues cu e persona en cuestion no ta doño di compania sino un trahado cu tabata fungi como comercial manager. Ademas su contracto a vence for di 2020 y a laga e persona ey bay. A sigura via gobierno Colombiano cu e compania ta cumpli cu tur rekisito di good standing etc, y como tal no tin ningun problema cu e contracto aki y cu e no tin implicacion pa Aruba. Loke ta keda un pregunta, ta ken e persona ta cu a firma e contracto, ya cu segun e potret saca na 2019, lo esey tabata e persona doño, y cu lo ta e mesun cu a keda deteni na Merca. Noticiacla no tabata na e conferencia pa por a haci e pregunta aki lamentablemente. 

  • Varadero
  • Powered by SETAR