Ministernan di Aruba cu atake publico contra politiconan Hulandes y local riba RAFt

Posted on 09/15/2023 10:41 am AST | Updated on 09/15/2023 11:01 am AST

ORANJESTAD – Por lo menos tres minister di gabinete Wever Croes diahuebs a opta pa lansa atake directo y publico riba mandatario y politiconan Hulandes y politiconan di Aruba, relaciona cu e tema di RAFt y refinanciamento di e debe di Covid19. Tur tres a opta pa haci nan comentario riba nan pagina di Facebook, respectivamente, un dia despues cu Tweede Kamer a trata e presupuesto supletorio riba Reino Hulandes. Un di nan a lansa su atake mas local, pero tambe cu e tema di RAFt. E mensahe tabata hopi cla, esta cu e mandatarionan kier mustra bon cla na tur hende, incluyendo politiconan contrincante local y esnan na Hulanda cu nan no ta baha cabez pa politiconan Hulandes, incluyendo e propio secretario di estado Hulandes van Huffelen y tampoco ta acepta e tono den cual e mandatarionan Hulandes ta papia ora cu ta trata Aruba su asuntonan politico.

CRITICO PUBLICO DURANTE NEGOSACION NO TA BON

Di otro banda, e accion di e mandatarionan ta interesante tambe, si tene na cuenta cu apenas siman pasa ainda, secretario di estado Hulandes a comenta na Noticiacla riba esaki. Specificamente cu e no ta haye conviniente y corecto cu mientras cu ta negoshando na mesa, e tin cu tende gritonan y ideanan aparece den media y rednan social. Esaki obviamente no a para e mandatarionan di lansa nan atakenan contra e mandatario en cuestion y tambe parlamentarionan Hulandes. Aki e tabata referi na e declaracion haci pa otro mandatario local, esta minister Ursell Arends cu a bisa publicamente cu e kier un aclaracion di Politiek Den Haag riba e asunto di RAFt y refinanciamento.

TRATA ARUBA Y RAFT DEN TWEEDE KAMER

Tabata e siman aki ( diaranson ultimo) cu Tweede Kamer a trata e presupuesto suplementario cu ta trata Relacion di Reino Hulandes pa asina por inclui e refinanciamento di e debe di Covid19, pa Aruba, Corsou y St Maarten. Durante e reunion aki, tabatin declaracionan haci pa algun miembro di Tweede Kamer, cu tabata considera como fuerte den direccion di secretario di estado Hulandes van Huffelen. Ta e comentarionan aki a cay den mal tera aki na Aruba cerca e gobernantenan, si tene cuenta cu e momento cu e atakenan aki a bin, esta un dia despues di e reunion.

COMENTARIO DI MINISTERNAN

Minister Dangui Oduber a cuminsa cu su critica, bisando “ Na aña 2010 Hulanda a paga 4 biyon florin di debe di pais Corsou a cambio di RAFT. Awe na 2024 Corsousu debe ta bek na 4 biyon florin! RAFT a funciona!????” e mandatario ta bisa textualmente riba su pagina di Facebook. Minister di husticia Rocco Tjon no a keda keto y a comenta riba su pagina di Facebook :” Entre awe y ayera mi a scucha diferente politiconan Hulandes, entrenan e secretario di estado, troce e hechonan. Mi a te hasta scucha un politico Hulandes bisa cu e ta irita. Loke ta irita nos ta e hecho cu e Hulandesnan no ta compronde e dossier, no ta interesa pa compronde y riba dje kier gana placa riba custia di Aruba”. Y minister di finanza mes, Xiomara Maduro tabatin e critica di mas largo riba su pagina y a inclui critica contra politiconan contrincante local y tambe Hulandes. “ E cos di mas tristo ta ora bo no ta kere den bo Pais, den bo hendenan y den bo mesun potencial como Arubiano. Bo ta just bay tras locual Hulanda, STAS y e Hulandes bisabo. Shonnan nunca Aruba a haya interes na 3%. Minimo cu Hulanda a presenta ta 5%” e ta cuminsa na bisa. Despues e ta considera cu loke cu e secretario di estado Hulandes ta bisa, no ta realistico :”E asunto di interes na 6% cu 8% cu STAS Van Huffelen ta papia di dje ey tampoco ta realistico mirando e señalnan di e mercado y oferta pa Aruba. E 30 miyon eynan tampoco no ta existi”. E mandatario ta sigui tilde Hulanda di kier hinca miedo den Aruba:” E style di hiba e politica di hinca miedo den Pueblo di Aruba y tambe di hinca duda den nos MinPres y den e Arubiano mester stop. Hulanda y STAS no por ta papia riba 'Slavernijverleden en zijn doorwerking in het heden' anto ta actua asina aki. Ta mesun manera di esclavisa hende y nan mente atrobe y di manda nan e señal cu nan no ta sirbi pa maneha nan mesun Pais, nan mesun cas y nan mes como hende”. E ta sigui comenta: “ Anto na Aruba nos no por keda cu e style aki ta trece desconfiansa den hende cu ta saca man pa haci e miho pa e Pais aki. No ta tur cos ta perfecto na Aruba, pero ban ta sincero cu otro, na Hulanda si tur cos ta koek en ei? Ik dacht van niet! E realidad ta na Aruba mes y den nos mesun man. Tuma responsabilidad y traha pa haci un diferencia na bienestar di Aruba. Ta Arubiano tin cu scapa e Pais aki di esnan cu kier abusa. Ningun Hulandes otro banda di oceano por stima e Pais aki mas cu e Arubiano cu ta biba na Aruba. Ta esnan cu no ta stima e luga aki, esnan cu no kier haci un esfuerso, esnan cu ta prefera bende nan alma pa puesto, ta pidi pa bay na amen sin busca kico ta miho pa Aruba y e Arubiano. Y no bin aki rato cu e carchi di 'doe het voor de kinderen,' paso di hopi tempo caba Hulanda por a yuda nos y nos yiunan, mescos manera nan ta yuda yiunan na otro Paisnan na mundo. Aruba mester yudansa di un curason gradici. Na Hulanda nan no mester maluza un situacion di necesidad ocasiona pa un pandemia, pa bolbe colonisa alma y mente di hende cu nan ta scohe pa mira manera como obheto pa haci comercio cun'e. No ta pa e pensamento eynan Hulanda a pidi despensa poco luna pasa? Shonnan, ban laga MinPres haci su trabou di busca un miho deal posibel pa Aruba cerca Hulanda. Arubiano apoya un otro Arubiano cu ta busca un solucion pa e Arubiano y tur cu ta sinti nan mes Arubiano, por biba un bida digno na Aruba”, e mandatario a finalisa bisando riba su pagina di Facebook. No ta inusual cu e mandatarionan aki (y otro nan den pasado) ta comenta publicamente riba temanan riba nan pagina di Facebook.

Croes: Salario minimo ta surpasa 2000 florin pa luna na januari 2025
ORANJESTAD - Minister di Labor Sr. Glenbert Croes a anuncia diabierna cu despues di dos aña di trayectoria, Conseho di Minister di Gobierno di Aruba a aproba salario mínimo pa ora. Un aumento cu lo beneficia significativamente tur trahado aki na Aruba. E cambio aki ta resultado di hopi analisis y investigacion cu a inicia na 2022 y ta drenta na vigor 1 di januari 2025.
Mas Politica
Lesa Mas
Beach na Rodgers Beach lo bira mas grandi cu proyecto di embeyecimento
ORANJESTAD – Si tur cos cana bon, aki cuater luna, e beach na Rodgers Beach lo ta mucho mas grandi. E siman aki a tuma luga na San Nicolas, e ceremonia di groundbreaking di e proyecto di embeyecemento di Rodger’s Beach. Prome Minister Evelyn Wever-Croes tawata presente pa e ocasion aki hunto cu Minister Dangui Oduber.
Mas Politica
Lesa Mas
Lo converti cas di mayornan di Betico Croes (dfm) den un museo moderno
ORANJESTAD - Lo converti e cas di e mayornan di Betico Croes (den feliz memoria) den un museo ultramoderno cu e historia di Betico, e lider y estadista stima pa su pueblo, unda cu e alumnonan di scol y nos bishitantenan por conoce un poco mas di e bida y lucha di nos libertador pa nos Status Aparte. Manera ta conoci, e proyecto a inicia dos aña pasa y tin un comision cu ta trahando duro pa por logra cristalisa e museo.
Mas Politica
Lesa Mas
Hulanda a informa Aruba te despues cu Gonzalez a sali for di Venezuela
ORANJESTAD – Prome minister di Aruba Eveyn Wever-Croes a wordo informa di e salida di Edmundo Gonzalez for di Venezuela ora cu ya e la bandona Venezuela. “Ami a wordo informa diadomingo mainta despues di e candidato di oposicion ya a sali pa Spaña caba” Wever-Croes a contesta Noticiacla riba e pregunta. Esaki tabata importante pa Aruba mirando cu Aruba pa asuntonan internacional ta cay bou di Hulanda y cu cualkier accion di Hulanda por afecta Aruba. E mandatario ta mustra di no tabata mucho contento cu e forma con cos a bay. “ Mi a puntra Hulanda dicon nan no a avisa nos prome y nan a informa cu pa seguridad di e staf y personal si embahada, e noticia aki a keda solamente den un grupo hopi chikito” e mandatario a finalisa bisando. Esaki ta interesante pasobra tin informacion cu Corsou, no tabata na altura mes, y no ta conoci si ey tambe ta despues di e hecho, nan a wordo informa.
Mas Politica
Lesa Mas
Wever-Croes: Aunke demisionario, lo termina proyectonan na San Nicolas
ORANJESTAD – Diaranson 11 di september Prome Minister Evelyn Wever-Croes a reuni cu e Daily Board di San Nicolas Business Association (SNBA) pa trata proyectonan den ehecucion. Gobierno ta reuni riba base regular cu diferente stakeholder y San Nicolas Business Association ta un stakeholder importante mirando e proyectonan den planificacion y den ehecucion na San Nicolas.
Mas Politica
Lesa Mas
Diadomingo Gerlien Croes ta presenta TUR: ‘Transparencia, Union y Respet!
ORANJESTAD – Parlamentario independiente Gerlien Croes a pone fecha ‘porfin’ pa lansa su propio partido politico, of por lo menos esey ta loke cos ta mustra pasobra te awor, Gerlien Croes no a confirma cu e loke e ta ‘bezig’ cu ne ta enberdad un partido politico. Pero ta asumi cu esaki lo ta e caso. Loke a ‘cambia’ ta e color di e presentacion, cu si prome esaki tabata color teal, esaki awor tin un color biña. Y tambe a bira conoci kico e palabra TUR ta para pe. Esey ta bira Transparencia Union y Respet. E conferencia ta poni pa cuminsa 6’or y mei te cu 8’or. Mientras cu prensa a haya su invitacion, e invitacion a bay publico tambe riba su paginanan social manera e.o. Facebook. Esaki ta nifica tambe cu cualkier ‘chens’ pa subi bek riba lista berde, esta AVP, ta keda elimina. Por lo menos esey ta e parecer. E pregunta ta keda cu si e logra asiento, si e ta dispuesto pa traha cu AVP si nan logra haya asiento pa forma un gobierno. Tur ta speculacion, pasobra ainda no ta ni sigur cu ta un partido politico e lo presenta.
Mas Politica
Lesa Mas