Van Huffelen ta haya fastioso cu minister ta publica ‘ideanan’, mientras cu ta negoshando

ORANJESTAD – Declaracionan publico den prensa manera cu minister Ursell Arends a haci siman pasa, esta puntrando Hulanda pa ‘claridad’ riba e situacion di debe, no ta yuda e relacion entre Aruba y Hulanda. Siman pasa e mandatario di Aruba a publicamente manda un articulo unda cu e ta puntra Hulanda pa claridad riba e situacion di debe. Esaki mientras cu partidonan ta na mesa ta negosha. Noticiacla LIVE a puntra e mandatario Hulandes, si e tipo di articulonan aki ta yuda, of strobe e negosacionan of nan no ta relevante. 

VAN HUFFELEN TA HAYA E SITUACION FASTIOSO

“Loke ami ta haya hopi fastioso, ta mientras cu e momento aki nos tin bon combersacion cu e premier (di Aruba:red). e premier a bisa cu e ta haci un propuesta, cu ta pas, cu ta yuda, pero e propuesta mi no a haye ainda” sra Van Huffelen a cuminsa na bisa. “Y si e propuesta no ta bin, naturalmente esey (e mensahe di Ursell Arends:red) no ta constructivo. E no ta yuda den e relacion, pasobra atrobe, mi ta trahando pa tin hopi bon palabracion cu e pais, y mi tin hopi gana di traha hunto cu e gobierno, pero e ora mi mester tin un partido cu ta percura pa tin bon propuesta. Y un biaha mas; Mi no a haya nan” e ta sigui bisa. “Y mes momento, no ta yuda ora cu varios relato ta aparece den prensa riba ideanan cu gobierno tin, mientras cu e no ta wordo comparti cu nos” e mandatario a sigui bisa, refiriendo na e articulo di Arends y otro articulonan di gobierno riba e tema di negosacion. Por scucha e contesta di Van Huffelen AKI.