Van Huffelen na Tweede Kamer: Aruba no a cumpli cu deadline y lo paga mas interes awor

DEN HAAG – Si tabatin cualkier duda di interpretacion entre Aruba y Hulanda kico a pasa dia 1 september pa cu un deal pa refinanciamento di e debe di Covid19, diaranson merdia ora di Aruba, secretario di estado Alexandra van Huffelen a confirma un biaha mas durante tratamento di e presupuesto supletorio di Tweede Kamer riba Relacion di Reino, cu tabatin un deadline cu Aruba no a cumpli cu ne, y cu pesey awor Aruba tin cu bay paga interes mas halto conforme mercado internacional, pa paga e debe di Covid19 bek. 

KICO A PASA

“Mi a ricibi di Aruba un dia prome (cu 1 september ultimo cu tabata e deadline pa tin un acuerdo:red) un propuesta en general pa e Rijkswet (di RAFt:red) y un concepto pa un landsverordening revisa (LAFt:red). E intencion tabata pa prome cu deadline, pa tin un palabracion y yega na un acuerdo, pero nos no tin un acuerdo ainda riba esey” van Huffelen a confirma diaranson. “Y ta importante cu e revision di e LAFt tambe bin na ordo, na tempo. Pues basa riba e informacion cu nos tin, y mi ta bisa esey cu tristeza den mi curazon, cu nos no por duna Aruba nada otro cu un prestamo anuitario, cu un tempo di pago di 20 aña, cu un interes mas halto di entre 6 y 8%, y esey ainda ta dependiendo kico e interes ta e momento ey riba mercado. Y esey kier men tambe cu e interes cu nan ta pagando lo ta igual na esun cu nan lo ta pagando riba mercado di capital ora cu nan fia placa” e secretario a sigui bisa. “Y esey ta un interes cu ta halto, mas halto cu esun di Hulanda, pasobra Aruba su rating di credito ta mas abou cu esun di Hulanda”. E mandatario a bisa cu por adapta e termino ey ora cu Aruba cumpli cu e condicionan ainda. A mustra di e posibilidad cu pa 1 januari 2024 tin un LAFt nobo (ya cu esun actual ta vence dia 31 di December 2023), si tin un compromiso na nivel di gobierno pa yena e contenido di e Rijkswet, den cual tin e normanan cu Hulanda y Aruba a palabra cu otro, e ora tin e posiblidad pa ofrece Aruba miho interes. Pues, un biaha mas e mandatario a splica na placa chikito, kitando tur duda kico a pasa na comienso di e luna aki, kico a sosode y kico mester a sosode y pakico Aruba aworaki ta den e situacion cu e ta. E la confirma un biaha mas cu tabatin un deadline, cu Aruba no a cumpli cu ne, segun Hulanda, y cu pesey por lo pronto Aruba tin cu paga mas na interes. Por scucha e grabacion di voz AKI.