Corte: Ta trata apelacion di caso Avestruz integralmente na mei di 2024

ORANJESTAD – Corte di apelacion a reserva e di dos siman di luna di mei 2024 pa trata e caso di apelacion Avestruz. Asina e tres hueznan a informa e abogadonan di e 7 sospechosonan durante e asina yama regiezitting diamars atardi.  cu ta wordo scucha un biaha mas den apelacion. Ta trata di e sospechosonan Benny Sevinger, Pieter Sussebeek, Carlo Mansur Jr, Maria Leoncita Arends, Ninuska Nuñez, Edgar (Gabby) Werleman y Curt Harms. Tur sea a apela parti di nan sentencia den e prome caso, of Ministerio Publico a apela nan sentencia. Specificamente, cuater sospechoso a apela parti di nan sentencia mientras cu Ministerio Publico a apela sentencia di tres sospechoso. 

SCUCHA 

Durante e tratamento di e caso awe, abogadonan por a presenta nan deseo pa cu nan cliente, unda cu apenas 2 abogado a pidi pa scucha 2 testigo mas. Ta trata di L. Harms y A. Fowler.  . Fuera di esaki, tin 4 otro testigo cu ya caba a wordo solicita pa wordo scucha den e caso, pa e caso di sospechoso Benny Sevinger. Segun abogado Demis Illes, e dos testigonan nobo aki por duna claridad riba e asunto di e gym na cas di Sussebeek, y tambe e bendemento di tereno na Sussebeek, pa cual e ta wordo acusa.  Ademas abogado pa sospechosonan Nuñez y Werleman, Rudy Oomen a pidi pa un testigo, den e caso aki un notario J, pa loke ta e proceso di traspaso di tereno erfpacht, unda cu kier demonstra cu ningun momento e clientenan no a malinforma gobierno di Aruba cu nan transaccionan. Tur e peticionan haci, lo wordo considera pa e tres huesnan cu ta trata e caso otro aña, y lo tin un sentencia riba e peticion, otro siman 20 di September pa 2’or di atardi. E caso mes ta programa pa cuminsa otro aña dia 13 di mei y a reserva henter e siman ey di mei, pa trata e caso. Esey no kier men cu lo usa tur e dianan ey, sino cu e ta un planificacion cu por cambia ainda.