Carta confidensial i conseho di Cft pa Eerste i Tweede Kamer

WILLEMSTAD - E direktor general (DG) di Relashonnan den Reino di ministerio di Asuntunan Interno, Hulanda den un nota anónimo ta konsehá sekretario di estado Alexandra van Huffelen pa e manda e konseho di Kolegio Supervishon Finansiero (Cft) riba presupuesto 2024 di Kòrsou i alabes un karta di Cft na su persona relashoná ku e akuerdo na nivel di ámtenar riba ENNIA mas lihé posibel pa Eerste i Tweede Kamer. Esaki despues ku via página sosial di minister di Finansa, Javier Silvania a lèk un di e konsehonan.

E konseho di Cft riba presupuesto 2024 di Kòrsou a lèk pasobra e minister a publiká esaki i konsekuentemente media a kuminsá skibi riba dje. Promé ku e konseho aki, Van Huffelen a risibí un karta di e akuerdo na nivel di ámtenar riba ENNIA. Pa informá Eerste i Tweede Kamer mas mihó posibel riba e proposishon di lei, pa un presupuesto supletorio insidental 2024 ku ta enserá un fiansa di 1,2 miar euro pa Kòrsou, Aruba i St. Maarten e DG ta konsehá Van Huffelen pues pa manda e konseho i e karta pa Eerste i Tweede Kamer.

E DG ta bisa sinembargo ku e manera di proseder aki no ta usual pero ku mester mira e situashon aki komo unu eksepshonal, pa motibu ku e karta di Cft di 21 ougùstùs no ta intenshoná pa públiko, mirando ku esun ku a skibi e karta a pone informashon konfidensial den esaki i e konseho di Cft a bai solamente pa Kòrsou i no tabata dirigí na Van Huffelen.

Mas aleu e DG ta aklará ku apesar ku prensa den su relatonan ta pone un relashon direkto entre e presupuesto supletorio insidental i e akuerdo na nivel di ámtenar pa ENNIA, esaki den realidat no ta e kaso. E presupuesto supletorio insidental ta pa yega na refinansiamentu di e fiansanan di covid  di Kòrsou, Aruba i St. Maarten pasobra e fiansa ta kaduká e aña aki. E presupuesto supletorio insidental no ta regulá e kondishonnan di e refinansiamentu ni e kapitalisashon di ENNIA. Un posibel proposishon pa Hulanda finansiá e kapitalisashon di ENNIA lo bai mas despues pa e Eerste i Tweede Kamer, esta e DG.

Finalmente e DG a bisa den su nota ku a deliberá ku tantu Kòrsou, St. Maarten i Banko Sentral di Kòrsou i St. Maarten riba repartishon di e dokumentonan ariba menshoná. NOTA: E texto ta scirbi den Papiamento fonetico di Corsou.