Kock: Paskel y Andrade a cumpli cu nan trabou pa raporta ‘iregularidadnan’ den comunidad

ORANJESTAD – E caso pa cual presentadornan di e programa radial Enfoke, esta Patrick Paskel y Nelson ‘Speed’ Andrade ta den corte, ta basa riba un caso cu a cuminsa cu un entrevista den e portal Caribisch Netwerk den cual a sali publica, un entrevista cu e tempo ey comisario di polis Vanessa Kock cu tabata casa di awor minister Rocco Tjon. Segun sr Kock, su clientenan den e caso aki a cumpli cu nan obligacion di ‘watchdog’ pa raporta iregularidadnan den comunidad.  Su clientenan a conta di e articulo den cual e awor ex comisario Kock a referi na un caso unda cu tres polis tabata envolvi, mencionando  nomber y fam di e polisnan envolvi, pero cu un di e polisnan en cuestion a keda marca solamente como persona X. Y ta aki ta unda e caso a haya atencion, pasobra segun fuentenan di e dos presentadornan, e polis X ta trata di e actual minister di husticia, Rocco Tjon cu e tempo ey cu e caso a presenta, tabata un polis di rango halto. E caso, cu durante e caso sumario dialuna a bin dilanti, e resulta di tin e nomber Yuwana, y unda cu a confirma cu pa e caso aki, tabatin detencion di e tres polisnan, incluyendo Agente T y L, y esun ‘misterioso’ X. Tur tres polis a recobra nan libertad lihe, e caso a keda seponeerd y nan tur a bay traha bek. Aki e pregunta a keda lansa pa e presentadornan den e programa kico e rol tabata di Tjon, y cu Tjon realmente tabata e agente X. For di e entrevista cu a inicia e caso aki, basta cos a sali y cu ta informacion cu clientenan Paskel y Andrade a haya di nan fuentenan, nan a trece dilanti den nan programa Enfoke. Asina abogado mr David Kock a trece dilanti den e caso sumario den corte cu minister Tjon a entama cu e fin pa exigi rectificacion di e dos personanan en cuestion. Segun sr Kock, su clientenan a haci e pregunta den e programa radial, si Tjon enberdad tabata un sospechoso den e caso ey, y tabata kier pa Tjon contesta. E hecho cu Tjon tin un funcion publico awe, ta pone cu e ta necesario pa trece esaki den publicidad. Problema ta, segun abogado Kock, cu Tjon no ta pone su mes disponible na e dos presentadornan pa contesta e pregunta, y a opta enbez pa desmenti esaki via su pagina di Facebook. Ademas, segun abogado Kock, e presentadornan a lesa e contesta y reaccion di Tjon riba su pagina Facebook completo den nan programa radial, dunando Tjon asina e espacio necesario pa reacciona. Ademas, segun Kock, Tjon no ta papia cu e dos presentadornan y ta nenga di contesta pregunta di e medio cu cual e dos presentadornan ta liga, esta 24ora. E hecho cu e dos presentadornan a lesa e reaccion di Tjon den nan programa, ta pone cu nan dos (e presentadornan;red) a cumpli cu e exigencia di replica. 

BODEM PROCEDURE

Abogado Kock a pidi tambe pa ora cu huez dicta sentencia, no haci esaki pa ehecuta inmediatamente, pendiente cu na caminda por tin posibilidad pa scucha testigo. Y como tal mester duna espacio pa esey. Si huez dicta den un eventual sentencia di e caso sumario, dicta cu mester ehecuta e sentencia mesora, e ta kita e posibilidad aki. E abogado a alega cu e caso aki ta uno cu mester wordo trata den profundidad, cu ta brinda e posibilidad pa scucha testigo. Huez den e caso aki a rechasa ya cu ora cu a puntra contra partido si nan ta di acuerdo pa un caso di profundidad, e contra partido a rechasa e peticion. Como tal huez a rechasa e peticion pa trata e caso den profundidad. Abogado Kock a alega cu e caso aki no tin caracter di urgencia, ya cu e tema a keda trata for di augustus caba y cu e la pasa caba y ta lubida. Ademas, si dado caso tin un sentencia den nan contra, cu un eventual rectificacion mester bin solamente den e mesun forma cu e acusacion a keda presenta, esta via e programa radial. Tambe, un punto interesante, e abogado no ta haya cu mester atende cu e mandatario cu e titulo di ‘su excelencia’, cu ta algo cu e abogado di Tjon a bay di acuerdo y a bisa cu por substitui ‘su excelencia’ pa ‘minister’. Den e argumentacion sinembargo di abogado mr Kock, su clientenan no a atende e persona como minister y solamente como sr Tjon, pues asina e mester wordo atendi tambe den un eventual rectificacion. Asina mes, ta considera cu mester declara e peticion y exigencia di contra partido, como no adminisible. Huez a cera e caso na final y lo dicta sentencia dia 4 di October proximo. Por lesa e defensa di abogado Kock, AKI.