Segun BCA, a señala cierto movecion di Ennia Corsou sin cu CBCS a actua

WILLEMSTAD - Ennia Aruba si ta saludabel y rendabel pasobra Banco Central di e isla a actua, contrali na Banco Central di Corsou y St. Maarten. Esaki a sali na cla di un comunicado cu Banco Central di Aruba a manda recientemente, relaciona cu un noticia den prensa Hulandes cu a sali riba e tema di solvencia di Ennia na Corsou. Un noticia cu segun Banco Central di Aruba ta eroneo pa e parti cu ta haci mencion di Aruba tambe siendo cu Aruba su filial no tin ni arte di parti den esaki.   E reaccion di Banco Central di Aruba ta bin a base di informacionnan den prensa Hulanda, cu CBA pues ta considera como falso.

CBA ta cuminsa na bisa cu nan ta lamenta e informacion falso recien cu a sali den media Hulandes riba e entidadnan di ennia Aruba. E ta referi specificamente na e medionan Financieel Dagblad i NRC y ta lamenta cu ta sugeri incorectamente cu Ennia Aruba ta den problema cu cu Ennia Aruba tambe mester fia di Gobierno Hulandes pa proteha e tenedornan di polisa di Ennia Aruba. Segun BCA, for di e carta di dia 25 di augustus ultimo di secretario di estado Hulandes Alexandra van Huffelen na Tweede Kamer, ta keda demonstra cu e problemanan di Ennia no tin nada di haber cu Aruba y cu e entidadnan di Ennia Aruba. CBA ta bisa di ta desaproba cu e autornan di e articulonan en cuestion no a tuma nan tempo pa lesa e contenido di e carta menciona. 

Tambe, cu aunke cu CBA a base di su deber di mantene confidencialidad, no por duna informacion tocante Ennia Aruba, nan ta enfatisa cu e entidadnan di Aruba ta saludabel y rendabel, manera cu e relatonan annual, publica y certifica pa un oficina di accountant pa 2022 ta demonstra, y cu ta disponible riba e website di Ennia Aruba. 

Ennia Aruba ta admiti di ta forma parti di e grupo di Ennia, pero cu e entidadnan di Aruba ta solvente y ta cumpli cu tur rekisito estableci pa ley y CBA. Ademas, nan (CBA:red) ta remarca cu e loke a sosode na Corsou cu e entidadnan di Ennia, no por a sosode na Aruba. Ta sigui bisa cu CBA ta un autoridad di supervision estricto y nan no ta tolera comportacion inadecua. 

Segun CBA su relato riba e caso, nan ta bisa cu den caso di violacionnan serio di ley y regla, nan lo tuma accion inmediatamente. Loke ta hala atencion ta cu nan ta mustra cu ta ya for di 2007 cu CBA a dicidi, debi na transaccionan señala cu partidonan relaciona y falta di accion for di Centrale Bank van Curacao y St Maarten (CBCS), cu a dicidi cu e oficinanan di Aruba mester bira independiente. 

Cu esaki, e entidadnan a haya nan propio capital y directiva y for di e tempo ey ta cay bou di supervision directo y estricto di CBA. Pa resumi, nan ta haya sumamente lamentable y di desaproba cu ta envolvi Aruba y e entidadnan di Ennia Aruba den e informacionan Hulandes menciona. Por lesa e articulo original di CBA AKI.