Desaroyadornan di Secrets Hotel a bin Aruba pa actualisa nan mes riba situacion legal di e proyecto

ORANJESTAD – Gobierno di Aruba a reuni diahuebs cu e inversionistanan y desaroyadornan di e hotel Secrets na Seroe Colorado. Segun e relato di banda di gobierno, e desaroyadornan a keda trankil cu e splicacion di gobierno riba e situacion actual.  Gobierno a recorda cu, manera ta conoci, un parti di e proyecto aki ta den corte, y ta ocasionando un tardansa den e proceso di construcion di e hotel. Un situacion cu a ocasiona preocupacion pa e inversionista y desaroyadonan cu a bin bishita Aruba pa mira e avansenan. Aparentemente e desaroyadornan a haci un recorido y lo a keda ‘hopi impresiona’ cu e isla y a ‘fall in love’ cu e isla. Noticiacla mes no a papia cu e desaroyadornan pa tende di nan mes kico ta nan pensamento, pero ta relata e version di gobierno riba esaki. Por compronde di e relato, cu e grupo cu ta(bata) na Aruba e biaha aki, tabata mas grandi y cu tabatin hendenan cu nunca no a bishita nos isla ainda. 

PREOCUPACION

Segun e relato di gobierno, durante nan reunion, tanto Gobierno como e inversionista y desaroyadonan, tabata tin e oportunidad di trece nan puntonan dilanti, y expresa nan preocupacionnan.   

CONTENTO

Gobierno su relato ta menciona cu e presidente di e Grupo Martinon, sr Artur Cabre lo a expresa di ta contento pa scucha cu Gobierno di Aruba y e pueblo di San Nicolas ta para tras di e proyecto aki, mirando cu a inverti un suma substancial pa construccion di Secrets Baby Beach. “E ta gradici San Nicolas Business Association pa organisa e evento pa colecciona firma, y e pueblo di Aruba pa yega eynan y firma” e relato ta sigui bisa. 

UPDATE RIBA E CONSTRUCCION

Segun e relato, tambe ta importante cu e socionan por a haya un splicacion di Prome Minister di loke en realidad ta pasando cu construccion di e hotel, mirando cu e tradansa a cuminsa pone e socionan duda si ta excuse nan ta dunando pa para trabou. “Sr. Cabre a indica cu e reunion cu Prome Minister a trece un claridad na e socionan y mirando e compromiso di Gobierno pa haci e proyecto aki un realidad, a duna nan un sentimento di siguridad cu pronto Secrets Baby Beach Aruba por wordo inaugura” e relato di gobierno ta termina bisando.