Carta di Van Huffelen: Aruba lo cuminsa paga interes halto pa debe di Covid19

DEN HAAG/ORANJESTAD – Aruba no a logra entrega un propuesta na tempo conforme e deadline di Hulanda di 1 di September ultimo, pues Hulanda ta trahando un acuerdo di prestamo pa repago di e debe di Covid19, pero contra un interes di mercado di entre 6 pa 8% pa un periodo di 20 aña. Asina   secretario di estado Hulandes Alexandra van Huffelen a informa   gobierno di Aruba cual a keda ricibi dia 6 di September ultimo. 

LESA CONTENIDO DEN PARLAMENTO

Prome minister Wever Croes diahuebs mainta a lesa e contenido di e carta den Parlamento diahuebs mainta ora cu e reunion publico a sigui Gobierno di Hulanda ta den principio di acuerdo cu un solucion hybridico segun prome minister Evelyn Wever Croes a bisa Parlamento, refiriendo na e carta di sra van Huffelen. E mandatario di Aruba ta considera esaki como un ‘apertura’.

NO A CUMPLI CU DEADLINE 

Sinembargo, segun Wever Croes ta sigui bisa, cu debi cu e deadline a pasa di 1 september (cu no tin un acuerdo ainda:red), mester cuminsa traha riba e documentonan di 10 di oktober proximo pa implementa e pago bek pero cu interes halto. E mandatario Hulandes ta propone, segun Wever Croes, pa partidonan yega na un acuerdo riba e repago pero pa sigui papia y delibera y si prome di januari 2024 por yega na un compromiso di gobierno pa gobierno, di cual ta regla structuralmente e supervision financiero, e ora numa Hulanda e ta dispuesto pa ainda laga e interes bay mas abou. Prome minister ta considera esaki, aunke cu tin cu bay paga interes halto pa e prome dos añanan, un apertura pa traha ariba. 

INTERES MAS ABOU

Pa loke ta e interes mas abou, segun premier Wever Croes, Parlamento a bisa cu ta di opinion cu e interes mester ta 3.2% pero Hulanda a nenga y a bisa cu e mester ta 5.1% pero por sigui papia. Van Huffelen, segun Wever Croes, a pidi pa cuminsa mesora cu e combersacion a nivel di ambtenaar, pa despues por yega na un acuerdo riba nivel di gobierno. Unabez cu yega na acuerdo riba nivel di gobierno, lo tuma un periodo maximal di aña pa finalisa un ley di Reino, y pa Hulanda en todo caso un topico manera norma di presupuesto, lo tin cu ta den un ley di Reino. Tambe tin un mencion cu Hulanda kier pa prome cu 8 di September awor tin un doorrekening di Aruba cu ta un calculacion di capacidad di pago di Aruba, mester tabata cla 1 di September ultimo pero segun Wever, esaki tabata un misunderstanding ya cu nunca e no tabata un deadline segun Wever. Y a base di esaki e mandatario Hulandes ta ofrece e refinanciamento abase di un anuitaire lening menciona. Pa scucha e presentacion di prome minister Wever Croes riba e parti menciona, click AKI