Na Corsou, minister Martina ta hala atencion di su colega Silvania

WILLEMSTAD - Publiká nòmber di personanan promé ku firma un dekreto ku a nombra e persona den un funshon por tin konsekuensianan grave i por lanta espektativa falsu. Gobièrnu mester sigui prosedura i traha pa gana konfiansa di komunidat ku e ta aktua ku koutela i konforme regla manera stipulá pa Konseho di Minister. Asina minister di BPD, Ornelio ‘Kid’ Martina ta informá su kolega minister Javier Silvania por eskrito.

E karta di Martina a sali despues ku minister Silvania a transmití un reunion di trabou bibu riba su página di Facebook i publiká den un komunikado di prensa ku ta bai tuma 19 trahadó nobo na trabou na servisio di Ontvanger. Den e transmishon e minister asta a menshoná nòmber di tur e trahadónan i a puntra na vários okashon kon leu HRO, Shared Service Organisatie ta ku atendementu di e petishonnan pa nombramentu.

Den su karta Martina ta bisa ku gobièrnu mester protehá e kandidatonan i ku publikashon di nan nòmber adelantá ta un akto di mal gobernashon i no ta aseptabel. E ta violá e derecho riba protekshon di informashon di e individuonan. Tambe Martina ta enfatisá ku no ta deseabel pa otro ministernan referí abiertamente na e departamentu di HRO, Shared Services Organisatie den nan publikashonnan pasobra esaki por krea espektativa, preshon òf krítika for di diferente persona òf instansia. Esaki por trese e organisashon innesesariamente den un posishon inkómodo kaminda ku ta obligá e organisashon pa atendé ku un situashon ku nan no tin kontròl riba dje.

Den su karta Martina ta informá Silvania alabes di e último desaroyonan relashoná ku nombramentunan na Ontvanger, petishon pa promoshon di personal di duana i dunamentu di kompensashon èkstra pa ehersé sierto tareanan èkstra ordinario. Promé ku outoridatnan tuma un desishon riba nombramentu di personal nobo, Konseho di Minister mester akordá e vakatura. Despues ta inisiá ku un proseso di reklutá i selektá kandidatonan, Martina ta splika.

E servisio di Human Resources i Organisatie (HRO) di ministerio di BPD ta kontrolá si e kandidatonan ta kumpli ku e eksigensianan di e funshon i ta duna un konseho riba “schaal” salarial. HRO ta mantené un periodo di 2 siman pa ehersé e kontròl aki. Den kaso ku konstatá fayo ku prosedura òf ku kandidatonan no ta kumpli ku e eksigensianan mará na e funshon, ta komuniká esaki bèk ku e deportamentu konserní. Solamente ora ku konstatá ku e kandidato ta kumpli ku tur eksigensia di e funshon e minister konserní por proponé pa nombra e kandidato den e funshon, Martina ta sigui bisa.

“E petishonnan pa nombra personal na Landsontvanger, a drenta serka HRO riba 14 i 25 ougùstùs 2023. E petishonnan di mart 2023 pa duna algun trahadó di duana promoshon a drenta te yüli 2023 na HRO, Martina ta sigui bisa den su karta. “Banda di esaki e petishonnan no tabata kompleto i tabata inkorekto hasí. Ta te 16 ougùstùs a risibí e último adaptashonnan.”

Relashoná ku e petishonnan pa duna sierto personal di duana un kompensashon èkstra, Martina ta bisa ku esakinan a drenta dia 31 ougùstùs 2023 na HRO i den un kontròl ku a hasi a sali na kla ku a manda e petishonnan aki aden 8 luna despues ku a duna e personal e tareanan èkstra pa hasi. Ta bin aserka ku e tareanan èkstra no ta sufisientemente definí di moda ku no ta posibel pa kontrolá si e tareanan aki ta di un karakter èkstra ordinario kompará ku tarea ku e funshonario mester ehersé konforme su definishon di funshon. Tampoko ta bisto pa BPD dikon a skohe pa paga 15% na kompensashon èkstra.

Mas aleu BPD ta konstatá ku ta diferente ámtenar ta envolví den e plannan di reforma i si wak solamente un parti di e organisashon esaki por ta kousa di trato inhustu di ámtenarnan di otro ministerionan. Martina ta bisa ku HRO lo pone duana na haltura di e informashon ku falta den e petishonnan pa kompensashon èkstra. E ta bolbe asentuá den su karta pa Silvania ku, menshoná públikamente ku e petishonnan pa haña kompensashon ta entregá na HRO ta lanta espektativa serka e personal, miéntras ku ta despues ku e petishon ta aden ta bai husga e petishon aki na kriterio vigente. Esaki no ta konforme prosedura ku gobièrnu mester tene su mes na dje na tur momento. NOTA: Texto ta scirbi den Papiamento fonetico di Corsou.