Parlamento Hulandes a duna gobierno luz berde pa sigui negosha cu Aruba

DEN HAAG – E tema di refinanciamento di debe di Covid19 y e tratamento di ley di RAFt, no ta wordo declara controversial pues por sigui wordo trata normalmente pa e gabinete demisionario Rutte IV. Awe mainta Tweede Kamer su comisionan a trata e temanan di e lista largo, riba cual e dos temanan tabata poni tambe (manera Noticiacla a raporta anteriormente). For di BZK awe mainta, Noticiacla a haya confirma cu e dos temanan enberdad no a wordo declara controversial y pues ta bon noticia. Esaki pasobra esey kier men cu e gabinete y secretario di estado Hulandes van Huffelen por sigui ofrece Aruba ( y Corsou y St Maarten) refinanciamento di e debe di Covid19. Ademas pa Aruba, lo sigui trata e ley di RAFt normal, cu tur loke esaki ta implica. Tabatin e chens cu si Tweede Kamer dicidi cu e dos temanan aki ta bira controversial, no ta trata nan mas y ta warda esaki pa e proximo gobierno cu sinta. Tin otro temanan cu si a wordo declara controversial y cu pues tin cu warda trankil te ora cu e gobierno nobo sinta despues di e eleccion di Tweede Kamer na November proximo.